مش ده حسين؟
مش ده حسين؟
ياه ع السنين!
إوعاك تقولِّي انت مين؟
النخلة والدوم،
والقروش والمريلة،
واللعب بالمراجيح،
ورسم المنقلة،
وقت المطر،
والطين!
وعصرية زمان،
صوت الأدان،
ريحة الغدا،
صوت أمي،
مع صوت النِّدا،
يا محمدين.
مش ده حسين؟
والسوق،
وعم أحمد،
وبيَّاع العصير.
نداغة بونبوني،
وسكر في الفطير،
نفرش ونقعد،
أو نذاكر عَ الحصير،
نرسم نجوم،
وِنَّام ونشكر ربنا،
وحشتني تاني المريلة!
والنخلتين والفسحة،
مع صوت الجرس،
أستاذ سعيد،
وعصايته،
أيام الحصص!
مش ده حسين؟
فاكر خناقنا،
هناك،
في حوش المدرسة!
أيام زمان يا حسين،
في عمري ما تتنسي!
والنحلة والكورة،
وطيارتي الورق،
دابت خيوطها،
مافضلش غير ذكرى السنين،
وشوية من باقي الشبَه،
خلوني أسأل بالأنين،
مش ده حسين؟
ورجعت تاني للحواري الضيقة،
وما بين وشوش تايهة وماليها الشقا،
وفَّرت كل الأسئلة،
إلا سؤال:
بيتنا القديم عنوانه فين؟
ما سمعت غير التريقة!
عيِّل صغير ولَّا تايه ولَّا مين؟
وسألت كل الموجودين،
واتاريني في البيت القديم!
لكن حيطانه اتبدلت،
ووشوش كتير اتغيرت،
وملامح الماضي اللي كنت زمان قاريه،
ماعرفتهاش!
تفاصيله راحت ويَّا تفاصيل الوشوش!
