رواية ٢٨ يوم
تعريب أحمد بك البابلي وحامد أفندي السيد، العرض الأول بتاريخ ٧ / ١ / ١٩٢٦
(يرفع الستار عن منظر دكان برانيط، الصانعات يقُلْنَ لحنًا، تدخل زبائن.)
لحن الافتتاح
بنات
:
البرانيط على آخر مودة
وكحلي وسودة البرانيط
يا مين يشوف زباينا
قيافة جنسها إيه
في بدعهم عاجبينا
حاجات الأفرنسية
بنات
:
يا رب نغنغهم وأبسطهم
وديم لنا دماغهم كلتهم
نهيص ونكسب منها فلوس، البرانيط
أوكتفي
:
دي صنعة فضلها فوق الروس، البرانيط
شغله تسلي ورايجة تملي
والأشيا في غاية الترللي
هندسة أهيأ من دي مافيش، البرانيط
بالكورديلات والكرانيش، البرانيط
ومهاودين في البيع يا زباين
موش عايزين غير حق الريش
بنات
:
دام الريش إن شاء الله تعيش
الجميع
:
بص وشوف عالمكشوف
البرانيط جوه البترينة
شيء يهوس منظرهم زينة
وأنا مالي هه
يا تجيب برنيطة
يا أزعل هه
وأعمل لك زيطة
رجال
:
بريه م الحريمات بريه
تحلوا وبرنا ولاد الإيه
ما يونُّوش عن قولة هات
واللي عليهم اسمه جنيه
أوكتفي
:
الحريم مالهومش غير البغددة
والأصول في الدنيا كُلَّتْها كده
بنات
:
الرجال واجب عليهم
الفلوس ما يعزوهاش
داحنا بنشبرق عليهم
والمحبة موش بلاش
الرجال
:
المحبة شيء مقدس في القلوب
موش ضروري بالمطامع والفلوس
الفصل الأول
أوكتفي
(بعد اللحن)
:
يالَّه يا بنات، أحسن صاحبة الدكان زمانها جاية، وانت خلصي البرنيطة اللي في
إيدك دي قوام، أحسن المدموازيل برنيس صاحبة الدكان تزعل.
بنت
:
هي لحقت تزعل، دي يا دوب شارية الدكان من صاحبتها القديمة مابقالهاش يجي
عشرة أيام.
أوكتفي
:
وماله، ما هو علشان رخره عايزة تظهر للزباين إن مواعيدها في الشغل
مظبوطة. يالَّه كل واحدة تشوف شغلها.
الجميع
:
حاضر (ضجة) إيه دا كمان؟
أوكتفي
:
آه، دا الراجل الحلواني اللي جنبنا.
بنوا
(داخلًا)
:
بالعسل النحل يا بقلاوة
محشية صنيبر يا حلاوة
بنات
:
بالعسل النحل يا بقلاوة
محشية صنيبر يا حلاوة
بنوا
:
لا دي رخيصة لأجل خاطركم
اشتروا حتة وأنا أراهنكم
لا صينية ولا تنين يقضوكم
فرقوا يا بنات على روح أبوكم
بالعسل النحل يا بقلاوة
محشية صنيبر يا حلاوة
بنات
:
بالعسل النحل يا بقلاوة
محشية صنيبر يا حلاوة
بنوا
:
عمكو بنوا غنُّوا له غنوة
على بقلاوته الناعمة الحلوة
بقلاوتك بتنقَّط سكر
وفرسكا وطازة ومليانة
زي نهود البنات البكر
واللي تشوفها تقول رمانة
يا سلام على دي البانتسيانيا
بفرنك أعدلكو ثمانية
لما يدوقها البُق لوحده
موش ممكن يقبل حاجة تانية
بالعسل النحل يا بقلاوة
محشية صنيبر يا حلاوة
أوكتفي
:
بقى حضرتك الحلواني جارنا اللي فتحت جديد؟
بنوا
:
أيوه يا مدموازيل، أنا محسوبك، جاركم بنوا الحلواني، وجاي أقدم لكم
خدماتي: عندي بسطة، فطير، بوغاشة، خد البنت، لقمة القاضي، كنافة بلح
الشام.
أوكتفي
:
أوه عال عال!
بنوا
:
أمَّال، أنا عارف المداموزيلات الحلوين اللي زيكم تملِّي ريقهم يجري
عالحلو.
بنت ١
:
صحيح؟
بنوا
:
أي، هو يحب الحلو إلَّا الحلو، دانتو لو دقتوا حلوياتي ما تسلوهاش أبدًا.
هه، أجيب لكم كنافة والَّا بلح الشام؟
أوكتفي
:
لأ كنافة نحلِّي بها بعد الأكل.
بنوا
:
إن شاء الله تكون صاحبة المحل الجديدة بحبوحة زيكم كده.
أوكتفي
:
والله لسه ما نعرفش أخلاقها.
بنوا
:
على كل حال أهي برضه ست زيكم، وتحب اللي تحبُّوه.
أوكتفي
:
طيب يالَّه جهِّز لنا الكنافة بقى، أحسن ميعاد الغدا قرَّب.
بنوا
:
أديني رايح أهه، بس مع الأسف بكرة مش حاقدر آجي لكم.
أوكتفي
:
ليه؟
بنوا
:
لأني مسافر، راح أقضي الثمانية وعشرين يوم بتوعي في الفرقة اللي بتمرَّن
الرديف، يعني ٣٣ جي أورطة.
بنات
:
بكره، بكره.
بنوا
:
أيوه، لكن الدكان برضه شغَّال، وطلباتكم توصلكم تمام. أورفوار مدموازيلات
(يهمُّ بالخروج فيصطدم بميشونيه) إخص
دا بتاع الجاز.
ميشونيه
:
إنت يا حلواني الزفت، إنت خلاص الحلو طلع على عينيك عماها، بونجور
مدموازيلات.
الجميع
:
آه، مسيو ميشونيه.
ميشونيه
:
عبدكم، تحت أمركم.
أوكتفي
:
فيه خدمة يا مسيو ميشونيه، يلزمك برنيطة؟
ميشونيه
:
لا مرسي، أنا موش متعوِّد عالبرانيط، أنا ما خدتش إلَّا على دي؛ لأنها قيِّمة
وهيأة أكتر، (على حدة) يا سلام على
لطافتهم وخفة دمهم، تسمحوا لي يا مدموازيلات أقدم لكم … (يُخرِج ورْدًا من الصندوق).
الجميع
:
إيه وَرد؟
ميشونيه
:
أيوه، وأنا آسف اللي مانيش وردة أنا كمان.
الجميع
:
إزاي؟!
ميشونيه
:
أيوه، كان يبقى لي الشرف إني أكون على صدر واحدة منكم.
أوكتفي
:
آه، مرسي، إنت لطيف خالص يا مسيو ميشونيه، ولكن إنت جاي هنا ليه
النهارده؟
ميشونيه
:
أنا جاي أشقَّر عالجاز.
أوكتفي
:
ماله؟
ميشونيه
:
فيه هنا خرم بيتصرَّف منه الجاز.
أوكتفي
:
فين؟
ميشونيه
:
والله موش عارف، لكن لازم فيه.
أوكتفي
:
لكن إنت موش كنت هنا إمبارح وأول؟
ميشونيه
:
أيوه، أول إمبارح لقيته خرم سدِّيته، وإمبارح كمان، ولازم النهارده فيه
واحد تاني، بقى ما انتوش شامِّين؟
الجميع
:
أبدًا.
ميشونيه
:
آه، السلم أهه، يظهر إنكم ما بتشمُّوش.
أوكتفي
:
والله طيب ياختي عالمواسير بتاعه الجاز دي، اللي كل يوم بتنفس، هيه لقيت
حاجة؟
ميشونيه
:
أيوه، أديني عِترت في الحتة اللي بتنفِّس.
أوكتفي
:
دا آه صحيح فيه ريحة، موش كده؟
الجميع
:
أيوه صحيح.
ميشونيه
:
أحسن ماكنتوش مصدَّقين، لكن معلهش، أنا دلوقت أروح أجيب العدة وآجي وأكتم
لكم نفسه.
أوكتفي
(على حدة)
:
وبعدين بقى في الراجل بتاع الجاز ده، وأكتر مجيه هنا ورايح يخسِّر سمعتنا،
أنا لازم أفهم إيه غرضه، إسمع بقى، دي موش مسألة الجاز اللي إنت بتيجي
علشانها يوماتي، لازم فيه حاجة تانية، فمن فضلك فهِّمني إيه غرضك من
كده؟
ميشونيه
:
غرضي؟ من إيه؟
أوكتفي
:
من مجيَّك عندنا كل يوم.
ميشونيه
:
لا مافيش، بس …
أوكتفي
:
بس إيه؟ إحنا فاهمين تمام، إن حضرتك ماتجيش هنا إلَّا علشانا إحنا.
ميشونيه
:
طيب وماله.
أوكتفي
:
وعاوز منَّا إيه؟
ميشونيه
:
موش عاوز منكم إلَّا واحدة بس أتجوزها.
الجميع
:
مين؟ أنا أنا أنا.
ميشونيه
:
أيوه، بس بدِّي أؤجل النقاوة دلوقت أحسن مسافر.
الجميع
:
مسافر؟ على فين؟
ميشونيه
:
على مونتارجي، أمضي الثمانية وعشرين يوم بتوعي تحت السلاح، وحارجع لكم
إن شاء الله بعد كده. أورفوار بقى.
أوكتفي
:
طيب والماسورة المنفِّسة دي موش حاتصلحها؟
ميشونيه
:
أيوه حاضر، بس أمَّا أروح أجيب العدَّة واجي.
الجميع
:
بس ماتغيبش.
ميشونيه
:
حاضر، أيوه وادي حيلة أرجع بها تاني، يا سلام حلوين قوي، دمهم زي
الكازوزة. لو كنت أتجوزهم كلهم دفعة واحدة (يخرج).
أوكتفي
:
باين عليه راجل لطيف ميشونيه ده.
زينب
:
أيوه ابن حلال.
توحيده
:
لا وخصوصًا إنه عاوز يتجوز واحدة منا.
برنسيس
:
أيوه، أهه.
أوكتفي
:
هس، صاحبة المحل جات، يالَّه شوفوا شغلكم.
برنسيس
(تدخل)
:
أديني رحت شبَّاك البوسته، وبرضه مفيش مفيش مفيش … هيه ماحدش جه هنا وأنا
غايبة؟
أوكتفي
:
أيوه يا مدموازيل.
برنسيس
:
مين؟
أوكتفي
:
زباين ستات.
برنسيس
:
ستات بس، مافيش حد تاني.
أوكتفي
:
أيوه، فيه كمان الراجل اﻟ…
برنسيس
:
مين؟
أوكتفي
:
اللي بيصلَّح مواسير الجاز.
برنسيس
(تشمشم)
:
أيوه أنا برضه شامه ريحه جاز، يظهر إن فيه ماسورة بتنفِّس. إسمعي، ماجاش
هنا واحد أسمر؟
أوكتفي
:
أسمر؟!
برنسيس
:
أيوه جدع أسمراني شويَّه، خفيف كده، وعليه القيمة.
أوكتفي
:
لا يا مدموازيل.
برنسيس
(لنفسها)
:
بالطبع بالطبع؛ لأن جواباتي مابتوصلوش.
أوكتفي
:
وحضرتك، بتحبِّي الجدع الأسمراني ده؟
برنسيس
:
قوي يا أوكتفي قوي.
أوكتفي
:
يا سلام، ودا غني يا مدموازيل.
برنسيس
:
غني قوي، وفوق كده تصوَّري الدم المصري، الظُّرف المصري، الكرم
المصري.
أوكتفي
:
مصري؟ ليه ماهوش فرنساوي كمان؟!
برنسيس
:
لا، ما هو الكونت فيفاريل لمَّا كان في مصر، جاب ويَّاه ولد أسمر صغير إسمه
عثمان عبد الباسط، وكان يحبه قوي، ونظرًا لأن الكونت ماكانش عنده أولاد
تبنَّى عثمان ده، وأوصى بثروته كلها له. يعني بقى دلوقت إسمه الكونت فيفاريل
عثمان.
أوكتفي
:
ودا بقى له كتير هنا في فرنسا.
برنسيس
:
كتير قوي؛ لأنه جابه الكونت وهو عمره خمس سنين، واتجنِّس بالجنسية
الفرنساوية، وأصبح كل قوانين فرنسا تسري عليه. اشتغلوا يا بنات اشتغلوا،
مافيش شيء ينفعكم غير الشغل وبس. إسمعي أنا داخلة لحد المكتب، إذا جه حد
إديني خبر، حاضر (تخرج).
أوكتفي
:
والله إن عقلها صغير، بقى تشغل نفسها علشان راجل، طب دنا لو كنت نزلت
دمعة واحدة على كل راجل عرفته، كنت مَلِيت بُحور.
كلاريت
(داخلة)
:
بونجور يا جماعة.
أوكتفي
:
أوه مدموازيل كلاريت! بقى لك مدة ماحدش شافك، تلات تشهر دلوقت من قبل ما
يتباع المحل لصاحبته الجديدة.
كلاريت
:
جديدة؟ إخص دنا كنا جاية أوصي على برنيطة.
أوكتفي
:
وماله، إحنا برضه في خدمتك.
كلاريت
:
لكن أنا عايزاها حالًا؛ لأني مسافرة بكره الصبح عند خالتي في انجوليم،
آه، وكمان جوزي جاي يقابلني هنا دلوقتي، إنت تعرفيه طبعًا لأنه مشهور
خالص، وهو اللي ربَّاني وطلَّعني من تحت إيده راجل.
أوكتفي
:
راجل!
كلاريت
:
أيوه، يعني علِّمني لعب الشيش، البوكس، التحطيب، النيشان، الجمباز المقالب،
الروسيات. يعني مافيش حد يغلبني أبدًا في أي حاجة من دول.
أوكتفي
:
يا حفيظ!
كلاريت
:
موش عيب أبدًا إن الست تعرف تدافع عن روحها بإيديها. عندكو مودات
جديدة؟
أوكتفي
:
راح أورِّيكي حاجات على ذوقك يا مدموازيل.
كلاريت
:
من فضلك قولي له يا مدام، موش يا مدموازيل.
أوكتفي
:
إزاي إنتِ أتجوزت؟
كلاريت
:
أيوه بقى له شهر، وكمان جوزي جاي يقابلني هنا دلوقت.
أوكتفي
:
إنتي اتجوزتي، مبروك يا مدام، ودا طبعًا كان جواز حب.
كلاريت
:
لا والله، هو أنت تنتظري من واحدة سبور زيي أنا، إنها تتجوز إلَّا
بالنبوت.
أوكتفي
:
إزاي ده؟
كلاريت
:
أوه، دي حكاية طويلة عريضة. إسمعوا لما أحكيها لكم، بقى كنت في يوم ٢٦
الشهر اللي فات رايحة أزور واحدة ست صاحبتي، وأنا ماشية راح مقابليني كبشة
تيران، وعَنْها، وواحد منهم بمجرد ماشاف حزامي الأحمر هاج وراح هاجم عليَّ،
فرحت صارخة بعلو صوتي.
الجميع
:
يا سلام!
كلاريت
:
وفي الوقت ده كانوا جماعة رجالة قريبين مني.
أوكتفي
:
وراحوا حايشينه عنك طبعًا؟
كلاريت
:
أبدًا، ولا حد منهم سأل فيَّ، لولا ربنا ستر وجِه واحد أسمر وراح ماسك
التور من ديله، فضل يشد يشد …
الجميع
:
يا سلام.
كلاريت
:
وأهه فضل يشد، لحد ما نفدت من التور، يا سلام على جماله!
الجميع
:
التور؟
كلاريت
:
لا، الجدع اللي خلصني منه. يا سلام! ساعتها عجبني خالص، وانقلب سواده ده،
بقى قمر قدَّامي.
الجميع
:
وبعدين؟
كلاريت
:
وبعدين أنا رحت مسخسخة ولا درتش بنفسي، ولما فقت لقيت الجدع الأسمر ده
واقف يبتسم لي، قمت رحت ماسكة فيه دوغري، وقلت له وأنا موش في وعيي، يالَّه
حالًا إتجوزني، قال مستحيل، قلت له مستحيل؟ إنت بترفض؟ وعَنْها ورحت سافخاه
كام قلم على وشه، وقلت له لازم أبارزك، وبكره أبعت لك شهودي.
أوكتفي
:
وهو قبل؟
كلاريت
:
أبدًا، ضحك وقال لي ماليش بركة إلَّا إنت يا مدموازيل، وبالطريقة دي
إتجوزنا بعض.
أوكتفي
:
دا شيء غريب خالص.
كلاريت
:
معلوم، إتعلموا يا بنات المبارزة، ماحدش يعرف بكره حايحصل إيه. يا سلام
جوزي ماجاش لسه، هو أتأخر ليه؟ بس مين عارف جوزي أتأخر ليه؟
أوكتفي
:
تحبِّي تتفرجي علي شوية برانيط لحد ما يجي المسيو جوزك يا مدام؟
كلاريت
:
لأ، موش دلوقت أحسن عندي ميعاد مع الخياطة الساعة ٣ تمام. عن إذنكم
دلوقت، ولما أخلص منها أرجع لكو. أوعوا تنسوا يا بنات، ذاكروا كويس.
أوكتفي
:
يالَّه سامعين يا بنات، خشوا الورشة، وأنا حاستنَّى هنا. (يقولون لحنًا).
خشي يا أختي من هنا هو
يالَّه نشوف أشغالنا جوه
لا الوقت يروح ونقول أبوح
لما تتخصم اليومية
والدكان صاحبته خلقية
الواحدة بعينها وعافيتها
دايرة تدوَّر على لقمتها
قايمة نايمة حايسة ولايصة
على نص فرنك لعيلتها
بالزور طايلة مصاريف بيتها
نشقى ونهلك غصب عنا
يا حرام الراحة ما بندوقها
حتى بنرهن حلق أوداننا
لما الصنعة يخسع سوقها
لكن برضه احسن من غيرنا
دي معايش مافيهاش جعيص
فُقَرا وبناكل من خيرنا
وخِلافنا يبيع عرضه رخيص
عثمان
(داخلًا)
:
بونجور مدموازيل.
أوكتفي
:
أهلًا وسهلًا، حضرتك عاوز برنيطة؟
عثمان
:
لا موش دلوقت، موش دي دكان البرانيط المودة؟
أوكتفي
:
أيوه يا مسيو.
عثمان
:
عال خالص، أنا مواعد واحدة ست من زباينكم علشان أقابلها هنا.
أوكتفي
:
واحدة من الزباين؟ آه، مدام كلاريت.
عثمان
:
مظبوط، إنت تعرفيها؟
أوكتفي
:
وأعرف كمان حكاية التور بتاعها.
عثمان
:
أي، هي قالت لك الخلبوصة؟!
أوكتفي
:
على كل حاجة، وعلى الكام لزق كمان.
عثمان
:
داهه أنا راخر اتلزقت فيها من يوميها، وهي فين أمَّال؟
أوكتفي
:
كانت هنا دلوقت أهه، وراحت عند الخياطة.
عثمان
:
بقى يعني أنا أتأخرت؟
أوكتفي
:
تقدر جنابك تنتظرها هنا، وأنا أروح أبعت لك صاحبة المحل تفرجك على حاجات
آخر مودة، لحد ما تيجي الست بتاعتك.
عثمان
:
هي قالت لك إنها حاترجع تاني؟
أوكتفي
:
أيوه يا مسيو، إنتظر لما أبعت لك صاحبة المحل (تخرج).
عثمان
:
والله موش بطَّالة البنت دي. يا سلام، أنا في غاية الانبساط من كلامها في
غاية السرور من مقابلتها، في غاية اﻟ… الحمار لأني نسيت أني متجوِّز، لأ
ومتجوِّز مين، بنت مجدع، لو عرفت عني أي حاجة مافيش غير اللزقان بأمان وطمان
قال زي زمان. بيني وبين الحاجات دي ربنا. آه والله إتحرمت منها يا ابو عفان.
فين أيَّام البنت دي اللي زي الغزال، فين أيامك يا برنسيس. الغاية ما بقاش يجي
منه (تدخل برنسيس) آه، برنسيس!
برنسيس
:
آه، فيكونت، إنت هنا؟! إنت جيت بعد كل الغياب ده؟!
عثمان
:
لا، أيوه … لا …
برنسيس
:
إنت اللي جيت تطلب البرانيط؟
عثمان
:
برانيط، برانيط إيه؟
برنسيس
:
برانيط حريمي.
عثمان
:
ومن إمتى بالبس برانيط حريمي ياختي!
برنسيس
:
أمَّال إزاي أوكتفي قالت لي فيه واحد خواجة …
عثمان
:
خواجة؟ آه، أيوه صحيح افتكرت، كان فيه واحد خواجة هنا ساعة ما دخلت، لكن
مشي وراح يرجع حالًا، بس كان نسي شمسيته في العربية اللي كان راكبها
إمبارح، راح يدوَّر عليها وجاي حالًا.
برنسيس
:
أمَّال إنت جاي علشاني أنا؟
عثمان
:
أمَّال علشاني أنا، هيَّ البنت اللي كانت هنا ما قالتلكيش حاجة؟
برنسيس
:
أبدًا!
عثمان
:
إخص، الله يخيِّبها، موش كانت تقولك على كلِّ شيء، نهايته الحمد لله اللي
شفتك بعافية، ودلوقت أورفوار بقى (يهمُّ
بالخروج).
برنسيس
:
رايح فين؟
عثمان
:
بس لآخر الشارع ده وراجع تاني، علشان نسيت شمسيتي.
برنسيس
:
إنت راخر؟
عثمان
:
أيوه نسيتها في العربية اللي كنت راكبها من يومين تلاتة. أروح أدوَّر عليها
وأرجع.
برنسيس
:
لا لا بخاطرها، أنا عندي شمسية عال قوي حاديهالك؛ لأني موش ممكن أسيبك
أبدًا، بعد ما لقيتك.
عثمان
:
لقتيني، ليه أنا كنت ضايع؟!
برنسيس
:
تلات تشهر دلوقت وأنت غطسان، وأنا بأدور عليك يا خاين.
عثمان
:
والله وأنا كمان بأدور عليك يا خاينة، بس يا خسارة ماليش بخت.
برنسيس
:
إزاي؟
عثمان
:
لا يعني، لو كان عندي بخت، كنت لقيتك قبل دلوقت.
برنسيس
:
طيب وليه فتِّني وسافرت؟
عثمان
:
لا أنا ما سافرتش، أنا كنت غايب بس علشان، علشان …
برنسيس
:
علشان إيه؟
عثمان
:
علشان كان لي قضية في بلاد برة.
برنسيس
:
بلاد برة؟!
عثمان
:
أيوه برة وبعيد، وانتِ عارفة القضايا البراني دي إن ماكنش الواحد يتصرف
فيها بنفسه، يسيبوه يرن ولا يسألوش عنه.
برنسيس
:
طيب كنت خدني ويَّاك.
عثمان
:
ماكنتش أقدر.
برنسيس
:
ليه؟
عثمان
:
لأن كان معايَ تلات شنط كبار، حاتبقوا كام، ومع ذلك أنا عرَّفتك في الجواب
اللي بعته لك.
برنسيس
:
إيه جواب؟
عثمان
:
لا جواب مين، تلات جوابات إنت ما استلمتهمش؟
برنسيس
:
أبدًا.
عثمان
:
إزاي ده؟ أنا لازم أروح حالًا في البوليس وأشتكي مصلحة البوستة دي
(يهمُّ بالخروج).
برنسيس
:
لا لا، وما دام إنت جيت، دلوقت خلاص نسيت كل حاجة، مابقتش زعلانة.
عثمان
:
والله أنا كمان موش زعلان، بس مزنوق هنا قوي (يمر يمينًا).
برنسيس
:
وخلاص موش حانفارق بعض أبدًا بعد دلوقت.
عثمان
:
إن شاء الله موش حانفارق بعض أبدًا، أورفوار بقى. (يهمُّ بالخروج).
برنسيس
:
الله مالك؟!
عثمان
:
لا ماليش، بس عامل حساب للأقلام.
برنسيس
:
أقلام!
عثمان
:
أيوه، أقلام كنت إشتريتهم، وبعد ما دفعت ثمنهم نسيتهم في المكتبة، رايح
أجيبهم وأرجع تاني.
برنسيس
:
والأقلام دول يعني كويسين، يستاهلوا الاهتمام ده كله؟
عثمان
:
إيه، دا صنف عال أنا مجرَّبه.
برنسيس
:
الغاية بخاطرهم دلوقت علشان خاطري أنا، إخص عليك.
عثمان
:
أيوه، إخص عليَّ وعلى الأقلام، آه يا حبيبي لو جات كلاريت دلوقت، الله
على الأقلام والبراطيش اللي تشتغل.
برنسيس
:
مالك بتفكر في إيه؟
عثمان
:
بأفكر في الأقلام برضه.
برنسيس
:
اللي نسيتهم.
عثمان
:
أنا أنساهم طول حياتي.
برنسيس
:
ماقلنا بخاطرهم دلوقت، وإحنا حانتعشى سوا، ولا نفارقش بعض أبدًا موش
كده؟
عثمان
:
أيوه، لا … بس …
برنسيس
:
بس إيه؟
عثمان
:
أيوه بس مع الأسف ماعنديش وقت؛ لأني أنا بكره مسافر الصبح بدري علشان
أقضي التمانية وعشرين يوم بتوعي في الجيش، ولسه حتى الشنطة بتاعتي
ماوضبتهاش، لما أرجع تاني، أورفوار (يهمُّ
بالخروج).
برنسيس
:
طيب موش على الأقل أساعدك في توضيب الشنطة؟
عثمان
:
بكل ممنونية (حدة) بس نخرج لتيجي
مراتي وتزنقني هنا.
برنسيس
:
طيب أنا رايحة أدي خبر للبنات، علشان يخلوا بالهم من المحل (تخرج).
عثمان
:
أيوه إدي خبر وأنا أدي جري. (تدخل
الورشة).
جيبار
(داخلًا)
:
آه!
عثمان
:
مسيو جيبار!
جيبار
:
أما صدفة جميلة جدًّا يا فيكونت، أنا جيت النهارده، علشان أتمِّم على أنفار
الرديف، وانت برضه موش مسافر مونتارجي علشان تقضي التمانية وعشرين يوم
بتوعك في الجيش.
عثمان
:
أمَّال يا عزيزي، بكره من بدري مسافر، أشوف وشك في خير بقى (يهمُّ بالخروج).
جيبار
:
كده دوغري، موش بس تستنى شوية؟
عثمان
:
لكن قول لي، إنت جيت ليه دلوقت، عايز حاجة من هنا؟
جيبار
:
أيوه، كلمة وَرَدْ غَطاها، معايَ جواب أوصله لصاحبة المحل ده من مراة
الميرالاي بتاعنا ونخرج سوا.
جيبار
:
أيوه، من حق أنا نسيت أهنِّيك.
عثمان
:
تهنيني على إيه؟!
جيبار
:
على إيه؟ آه يا مكَّار! على جوازك.
عثمان
:
آه صحيح، من مدة شهر إتجوزت واحدة جميلة، ومتعلِّمة خالص.
جيبار
:
متعلمة إيه؟
عثمان
:
شيش وبوكس، ومقالب، وأقلام رصاص وبسط وأمريكاني وأنا كنت منتظرها علشان
بيني وبينها ميعاد هنا، ولكن ما جاتش ولازم أروح أشوفها عن أذنك، أورفوار
(يهمُّ بالخروج).
جيبار
:
بس استني، يا سلام عليك، اتنين أصحاب زيِّنا بقى لهم زمان ماشافوش بعض
يفترقوا بالسرعة دي؟!
عثمان
:
هي صاحبة المحل مسلَّطاك؟
برنسيس
(داخلة)
:
أديني فُت خبر للبنات، آه ويَّاك حد؟
عثمان
:
المسيو جيبار ظابط بلوك السواري في الرديف، وإن شاء الله من بكرة حانكون
سوا في قشلاق واحد.
جيبار
:
مدام … والله بنت مكن.
عثمان
:
خدها لك يا أخي.
برنسيس
:
أنا تشرفت يا مسيو بمعرفتك، وخصوصًا إنك حاتبقى زميل عثمان.
جيبار
(لنفسه)
:
عثمان، عثمان من غير تكليف كده، آه دي لازم تكون هي مراته مدام، تشرفنا،
إحنا لسه كنا في سيرتك أنا وصديقي الفيكونت.
برنسيس
:
في سيرتي؟!
عثمان
:
الله الله، وحايلبخ يقول إيه ده؟
جيبار
:
صديقي الفيكونت يعبدك صحيح يا مدام، لسه دلوقت كان بيقول لي يا عزيزي دي
موش ست، دي ملاك.
عثمان
:
الله يخرب بيت اللي ملاك الملوة السودة دي.
برنسيس
:
آه يا عزيزي.
جيبار
:
عال عال.
برنسيس
:
صحيح يا مسيو جيبار كان بيقول لك عليًّ كده؟
جيبار
:
هو بس كده يا مدام، دا ياما كتب لي جوابات، كل جواب يجي أربعين ورقة
وكلهم وصف في جمالك، وفي حبه لك، وياما قال لي في الأول، إذا ماكنتش أتجوز
البنت دي حاتجنن.
برنسيس
(لعثمان)
:
صحيح يا عزيزي.
عثمان
:
أي، مانا حاتجنن أهه. ودي عايزة كلام، أنا متذكر إنك قلت لي ساعة ما جيت
إنك عاوز تروح ديوان الحربية علشان تستلم كشوفات الأنفار.
جيبار
:
آه، والله فكرتني، بس عايز أسلم صاحبة المحل الجواب ده بتاع مراة
القومندان.
برنسيس
:
وصل يا مسيو (تأخذ الجواب).
جيبار
:
أوه، العفو يا مدام، ولولا إني مستعجل خالص، ماكنتش أقبل أبدًا إنك تقومي
لي بخدمة زي دي، متشكر جدًّا يا مدام، موش تيجي معايَ يا فيكونت.
عثمان
:
أيوه أمَّال، ياله بنا.
برنسيس
:
لا، إنت تفضل معايا.
جيبار
:
أيوه المدام لها حق، مايصحش أخطفك منها وخصوصًا إنك مسافر بكرة، لكن أوعى
تنسى إنك تقابلني الساعة ٨ تمام قدام محطة ليون، تشرفنا يا مدام دا بيعبدك
يا مدام، بيموت فيك (يخرج).
عثمان
:
دا مصيبة، الله ينكِّد عليك وعلى معرفتك يا شيخ.
برنسيس
:
أنا رايحة أغيَّر هدومي وأجي علشان نخرج سوا عن أذنك (تخرج).
عثمان
:
أيوه غيَّري غيَّري (تدخل
كلاريت).
كلاريت
:
أنت هنا؟
عثمان
:
أيوه، لا، هنا.
كلاريت
:
أنت بتبص على إيه؟
عثمان
:
لا مافيش بس اﻟ…
كلاريت
:
بس إيه، أنا غبت عليك؟ ولكن الحق على الخياطة هيَّ اللي أخَّرتني.
عثمان
:
بَراوة عليها.
كلاريت
:
إيه؟ بتقول إيه؟
عثمان
:
لأ، يعني قصدي أقول، إخص عليها اللي أخَّرتك كده، يالَّه بقى نخرج من هنا يا
عزيزتي.
كلاريت
:
لا موش دلوقت، أنا عاوزة أنقِّي لي شوية برانيط.
عثمان
:
ومين اللي حايفرجك عالبرانيط، ما إنت شايفة الدكان فاضية مافيهاش حد
أهه؟
كلاريت
:
طيب إستنَّى أما أشوف كده.
عثمان
:
لا لا لأ، تعالي أحسن أنا اكتشفت حكاية لكن موش كويسة.
كلاريت
:
حكاية إيه؟
عثمان
:
بقى صاحبة المجل فلِّست وباعته لواحدة تانية، الولية اللي اشترته مجنونة
بتضرب الزباين والعمال، ودلوقت كانت ماسكة المقشة ونزلت ضرب في العمال،
بطحت اتنين وموِّتت سبعة.
كلاريت
:
وانت مين قال لك كده؟
عثمان
:
هي بنفسها اللي قالت لي.
كلاريت
:
وانت شفتها؟
عثمان
:
لا، والله ماشفتهاش.
كلاريت
:
مالك متلخبط كده ليه؟
عثمان
:
لا مفيش، بس بطريق الصدفة عرفت خبر زعَّلني خالص، خبر أثَّر عليَّ
قوي.
كلاريت
:
خبر إيه؟!
عثمان
:
قال حايبطلوا يوم الحد.
كلاريت
:
يعني إيه، ماهم طول عمرهم بيبطلوا يوم الحد؟
عثمان
:
أي والنبي إيه؟
كلاريت
:
سيبك من التهويش ده، دا موش مربط الفرس، العبارة لازم فيها شيء
مستخبِّي.
عثمان
:
لا يا عزيزتي، مستخبِّي إيه.
كلاريت
:
أمَّال مالك مانتاش على بعضك ليه من ساعة ماشفت وشي؟!
عثمان
:
ما أنا على بعضي أهه.
كلاريت
:
إنت فاكر إني أنا عبيطة، دانا أفهمها وهي طايرة.
عثمان
:
لا أستغفر الله، أنا عارف، يالَّه بينا بقى.
كلاريت
:
لا موش ممكن أطلع من هنا قبل ما أخد البرانيط اللي أنا عاوزاها، أما أروح
أشوف حد يفرَّجني على البرانيط (تدخل
الورشة).
عثمان
:
يا ست إخزي الشيطان وتعالي، ودي بلوة إيه دي، أيوه المفتاح من برَّة، نُسك
الباب عليها لتخرج تلخبط لنا الدنيا.
ميشونيه
(داخلًا)
:
برافو، أديني جيت أصلَّح الماسورة اللي بتنفِّس.
عثمان
:
ودا إيه كمان؟ حضرتك عايز برنيطة يا مسيو؟
ميشونيه
:
آه، فيكونت عثمان، صدفة جميلة؛ لأني ماكنتش منتظر أشوف جنابك قبل بكره في
القشلاق.
عثمان
:
إنت كمان مسافر بكرة؟
ميشونيه
:
أيوه من دفعتك في تلاتة وتلاتين جي أورطة، يعني حانسافر سوا.
بنوا
(داخلًا)
:
أدي الكنافة العال يا مدموازيلات.
ميشونيه
:
آه، دا الحلواني اللي زغدني وهو طالع.
بنوا
:
إنت برضه هنا يا بتاع المواسير يا وسخ، بقى كل ماجي هنا ألقاك.
ميشونيه
:
بقى وانت خارج قبل دلوقت، زغدتني وسكت لك، وكمان جاي تِقل حَياك.
بنوا
:
والله إنك بارد.
ميشونيه
:
دا بس لما شفتك يا لوح.
بنوا
:
أنا لوح يا مغفل!
عثمان
:
أيوه إياك يحموا، علشان أخرج أنا ومراتي.
بنوا
:
طيب أنا لازم أكيل لك.
ميشونيه
:
يعني أنا اللي حافرغ لك (يدخل عساكر ورجال
وسيدات ويقولون لحن ختام الفصل الأول).
بنات
:
مالكم يا ترى هايجين لايجين
إيه اللي جرى ما احناش فاهمين
زيطة وضجة وشيلة ورجة
عالحال ده لا بايعين ولا شاريين
دي أمور توقف حال الدكاكين
عثمان
:
دكاكنوا مرستان يا حبيبة
واللي يخشها عقله في راسه
تحصل عنده نوبة عصبية
زيي ولا يعرفش خلاصه
أوكتفي
:
لا قول لنا يا ابو سمورة
إيه المسألة إيه السورة
عثمان
:
شبكة وربكة وحبكت حبكة
ويا أبو بسطة وأبو ماسورة
كلاريت
:
خضيتوني جريتوني
الزعيق دا كله إيه
بنات
:
ناس أراذل ناس أسافل
خانقوا بعض أبصر في إيه
بنوا
:
اسأليه المسيو سامبو
اللي غلطان فينا مين
عثمان
:
هس جاك سمبو في عينك
نطع وكنافتك عجين
ميشونيه
:
يا مدام عندي شهود
عالومانجي ابن الوطا
عثمان
:
الحواجب والخدود
للكنافة متزروطة
عسكر
:
الجيران متضررة يا أجرمة يا كلاب
كل ساعة مدووشين دي إسمها قلت آداب
يالَّه حالًا عالبوليس
واللي شفته حاكتبه
واللي مايكونش حسيس
له حكومة تؤدبه
له معاون له ملاحظ
له بلاوي تكركبه
صفدان حذا صوله طبر
لا بدَّ من نحل الوبر
وأشهد هناك عالمسألة
باللي رأيته يا نفر
عثمان
:
وأنا كنت ناقص بهدلة
معلهش يا شيخ الخفر
عسكر
:
ايلرى قوام سر عتلرى
عثمان
:
وحستلرى، لخمتلرى، وهو تلرى، نايبتلرى
الفصل الثاني
(يرفع الستار عن قشلاق، الجنود يقولون لحنًا بعد الرقص.)
البروجي راح يزمر
للطابور في القشلاقات
يالَّه انت وهو شمر
واعملم الاستعدادات
إن دي تروا، إن دي تروا
الكساوي هيأوها باشليل
والزراير لمعوها باشليل
والبنادق للمناورات جهزوها
زيتوها باشليل عمروها باشليل
كل منهو يشد حيله يتبع واجب أصوله
السواري يجر خيله والبيادة يجر طوله
الجيوش العظام
ركها عالنظام
الجنود مفروض عليهم
واجبات لا بدَّ منها
والبلاد قدام عنيهم
مستحيل واحد يهنيها
في شرفهم في عهودهم
هم أرباب الدراية
ده وطنهم في وجودهم
يستحيل تنزل له راية
بيبن
:
يالَّه دلوقت روحوا استعدوا والطابور؛ لأن جناب القومندان حايستعرض أورطة
الاحتياطي، وإذا جه ولقي حد منكم موش مستعد حايعاقبه أشد عقاب.
ميشونيه
:
حقه صحيح؛ لأن القومندان بتاعنا باين عليه إنه راجل شديد قوي.
بيبن
:
شديد وبس، صحيح إنه في الاحتياطي، وبيأدي ثمانية وعشرين يوم زيك، لكن بصفة
قومندان فرقة الخيالة الاحتياطي في غياب القومندان الحقيقي ما بيتركش هفوة
صغيرة تحصل من أي واحد، إلَّا ويعاقبه عليها.
ميشونيه
:
في الاحتياطي! بقى على كده دا أصله ملكي زيِّنا موش جهادي.
بيبن
:
أيوه، دا واحد تاجر من التجَّار الكبَّار.
ميشونيه
:
وبيتاجر في إيه حضرته؟
بيبن
:
والله مانا عارف؛ لأني ما اشتريتش منه حاجة، يالَّه روحوا كلكم استعدوا
للطابور (يخرجون).
جيبار
(داخلًا يحمل بدلة)
:
جناب القومندان موش هنا؟
بيبن
:
لا لسه ماجاش.
جيبار
:
البدلة دي زيادة عندي، بتاعه واحد اسمه بنوا، ما استلمهاش لأنَّه ماقدمش
نفسه للخدمة لحد دلوقت.
بيبن
:
عظيم، إذا ماجاش لحد الساعة أربعة، إدي له جزا تمان تِيَّام حجز
قشلاق.
جيبار
:
إذن، أديها لعثمان علشان يرجعها المخزن.
بيبن
:
عثمان!
جيبار
:
أيوه الفيكونت عثمان، وريث الكونت فيفاريل.
بيبن
:
آه البربري، هو أتعيِّن في إيه؟
جيبار
:
لما استلمت النوبتشية عرفت إنه إتعين بلوك أمين برتبة باشجاويش في المكتب،
وتلاقيني انبسطت جدًّا لأنه جدع لطيف، وفوق كده صديقي.
بيبن
:
عظيم خالص، ودلوقت أسمح لي أروح أمر عالإسطبلات والعنابر، قبل جناب
القومندان مايجي ويفتِّش عليها.
جيبار
:
إتفضل جنابك (يخرج بيبن) يا عثمان، يا
فيكونت.
عثمان
(من الداخل)
:
مين اللي بيندهلي؟
جيبار
:
أنا، تعالى هنا.
عثمان
:
آه، مسيو جيبار، إنت جيت من الأجازة، ما شفتكش ليه من ساعة ما
استلمت؟
جيبار
:
أيوه لأني استلمت نوبتشية الأسبوع بتاعي من النهارده الصبح بأمر جناب
القومندان، خد البدلة دي خلِّيها عندك؛ لأن صاحبها ماقدِّمش نفسه لحد دلوقت، لكن
إنت إزاي حالك؟
عثمان
:
في غاية … لكن أنا كنت فاكر إن أجازتك حاتستمر تلات أربع تيَّام.
جيبار
:
لا والله يا سيدي، القومندان ما ادانيش غير أربعة وعشرين ساعة بس، ودا
بسبب الاحتياطي الزفت ده، ولاكانش عندي وقت إلَّا مسافة الطريق.
عثمان
:
ودا شيء يضايقك طبعًا؟
جيبار
:
أبدًا، بالعكس، أنا رجعت في غاية الانبساط.
عثمان
:
على كده ماكنتش لوحدك في أورليان؟
جيبار
:
وحدي فشر، دنا كنت مع حتة بنت لكن رِقة إيه وظرف إيه!
عثمان
:
إش، بقى على كده حصلت لك حوادث؟
جيبار
:
حوادث وبس، دي حوادث، وحكايات، وقصايد.
عثمان
:
تبقى إيه بقى الحوادث دي؟
جيبار
:
دي حكاية نكتة قوي (بروجي) آه البروجي بيضرب البس. يالَّه روح استعد
والبس هدومك، وبعد الطابور أحكي لك الحكاية بس ابقى فكَّرني أحسن دي حكاية
لذيذة خالص (يخرجان).
القائد
(داخلًا مع بيبن)
:
هيه، مفيش حاجة حصلت في القشلاق؟
بيبن
:
لا يا جناب القومندان، بس فيه اتنين غايبين. إمبارح بالليل واحنا بنتمم
لقيناهم موش موجودين.
القائد
:
ودول غايبين ليه؟
بيبن
:
والله موش عارف.
القائد
:
هيه، عظيم قوي، إحبس كل واحد منهم أربع تِيام. وإيه كمان؟
بيبن
:
وديكاسيو دوران السواري من الدرجة الأولى، يوم حجز قشلاق؛ لأنه تعدَّى على
حصانه بالضرب في الطابور.
القائد
:
آه، اتعدَّى على الحصان في أثناء تأدية وظيفته، إدي له بالجوز خليهم يومين.
وابقى هات لي قايمة الجزآت دي في المكتب علشان أصدَّق عليها، ودلوقت قول
للبروجي يضرب طابور.
بيبن
:
حاضر يا جناب القومندان (ينادي)
بروجي، اضرب طابور (يدخل
الجميع).
القائد
:
دول كل العساكر الاحتياطي الجداد، ماحدش ناقص؟
بيبن
:
مافيش إلَّا الاتنين الغايبين اللي قلت لجنابك عليهم، وواحد لسه ماجاش
خالص، اسمه بنوا.
القائد
:
لما يجوا ابقى هاتهم لي المكتب.
بيبن
:
حاضر يا جناب القومندان.
القائد
:
اسمعوا، إنتوا جايين هنا علشان تقضوا ثمانية وعشرين يوم تتمرنوا فيهم على
حمل السلاح، وبعد كده يروح كل واحد منكم لشغله، ودا علشان بتقول متمرنين
على الأعمال العسكرية، ودايما مستعدين لحمل السلاح إذا أحتاج الأمر لكده،
فدلوقت مفروض على كل واحد منكم إنه يفتح عينيه كويس، ويتبع الأوامر ويمرَّن
نفسه على النظام؛ لأنه بعد كده حايُعتبَر طول عمره عسكري تحت السلاح،
مفهوم؟
بيبن
:
مفهوم يا جناب القومندان.
القائد
:
فين الظابط النوبتشي؟
بيبن
:
موجود، الملازم جيبار.
جيبار
:
أفندم.
القائد
:
هيه، تمِّمت يا حضرة الظابط على نضافة القشلاق والإسطبلات؟
جيبار
:
أيوه يا جناب القومندان.
القائد
:
كويس، أنا دلوقت حامُر عليهم بنفسي، نمرة واحد.
جيبار
:
ماترد يا أخي.
عثمان
:
إيه، أنا؟
جيبار
:
أيوه انت، نمرة واحد.
عثمان
:
أفندم.
القائد
:
أنت مادخلتش قبل كده في الخدمة؟
عثمان
:
لا يا أفندم لسه طاظة.
القائد
:
وإيه وظيفتك أو صنعتك؟
عثمان
:
فيكونت.
القائد
:
فيكونت! عال خالص … تعالى هنا.
عثمان
(لنفسه)
:
حايقول لي كلام سر.
القائد
:
اسمع، إنت عايش إزاي؟
عثمان
:
زي الناس.
القائد
:
لا موش غرضي، يعني عايش لوحدك، والَّا ويَّا أهلك؟
عثمان
:
ويَّا مراتي.
القائد
:
برافو، وطبعًا بتاكلوا كويس، وبتشربوا نبيت عال؟
عثمان
:
طبعًا.
القائد
:
عظيم قوي (يناوله ورقة) خد ده فيه
أتمان البضاعة وعنوان المحل بتاعي.
عثمان
:
دا بيوزع إعلانات أهه!
القائد
:
فيه هناك نبيت عال وكل أصناف البقالة، ثم الأثمان متهاودة جدًّا؛ تنزيل
عشرة في المية للي يشتري بالجملة، وثلاثة في المية للي يشتري بشكك.
عثمان
:
واللي ما يشتريش؟ اللي ما يشتريش يتفرج.
القائد
:
لا موش ممكن إنك ما تشتريش؛ لأن كل البضايع مضمونة وكويسة، مفهوم؟
عثمان
:
مفهوم يا جناب اﻟ… القومندان.
القائد
:
وأهه بالطبع بعد ما تخلص الثمانية وعشرين يوم بتوعك حاتبقى تشتري من
المحل ده، وأؤكد لك إنك حاتكون مبسوط من معاملتنا، مفهوم؟ يالَّه
ارجع.
عثمان
:
بس من فضل جنابك عايزين بالنص فرنك ده جبنة، ولا تنساش تنزيل المية
عشرة.
القائد
:
يظهر إنك غبي، الحق عليَّ أنا اللي بأدي الأوامر دي لواحد زيَّك ينفذها
صحيح أنا جحش.
عثمان
:
لا العفو، إنت أكبر من كده يا أفندم.
القائد
:
يالَّه خش الطابور.
عثمان
:
زعلان ليه؟ أنا قلت ننفعك إنت أحسن من الغريب، يوجد عند جنابك مشابك
غسيل؟
القائد
(لنفسه)
:
يظهر إن طريقة الإعلان عن محلي موش حاتنفع بالشكل ده، الأحسن إني أطلبهم
واحد واحد في المكتب وأنبِّه عليهم، وأفهمهم إن دي أوامر رسميَّة لازم ينفذوها
(لبيبن) ودلوقت دستور الطابور ده
وتعالى انت المكتب علشان أدِّيك الأوامر اللازمة (يخرج).
بيبن
:
يالله يا دستور (يخرج).
الجميع
:
الواجب دعانا نحمل السيوف
والنفير نادانا هيا للصفوف
جيبار
:
مين يصون الحصون
ويفاديها قدنا
دي القلاع بالدفاع
عنها نحيي مجدنا
الجميع
:
الخطر مانرهبوش
والهوان مانرضابوش
والشرف تنباع له روحنا
أما هو مانبيعوش
جيبار
:
العَلَم فوق العلالي
نرفعه إحنا ببيدنا
مهما كان العمر غالي
لأجله يرخص عندنا
الجميع
:
العَلَم فوق العلالي
نرفعه إحنا بيدنا
مهما كان العمر غالي
لأجله يرخص عندنا
جيبار
:
في ميادين القتال
عزمنا يدك الجبال
بالشهامة والكرامة
تِنعرف قيمة الرجال
الجميع
:
الممات عالكل يسري
والوطن وحده يعيش
طول ما فينا دم يجري
البلاد ماتتنسيش
(يخرجون)
عثمان
:
تعالى قول لي حكايتك بقى يا حظ.
جيبار
:
إنت لسه فاكر؟
عثمان
:
ودي حاجات تتنسي، لا وخصوصًا الحكايات اللي فيها ستات؟
جيبار
:
بقى حكايتي يا سيدي إن النهارده الصبح لما كنت حاركب قطر الإكسبريس اللي
قايم على انجوليم …
عثمان
:
انجوليم! البلد اللي سافرت فيها مراتي.
جيبار
:
بس يا سيدي، أول ما طلعت القطر، لقيت لك في العربية اللي دخلتها حتة بنت
في غاية الجمال.
عثمان
:
رحت لازق جنبها طبعًا؟
جيبار
:
لا قدامها، بس يا سيدي، وقعدت أبص لها، لكن جمال إيه! عليها قوام، عليها
عيون، عليها مناخير!
عثمان
:
ما كل الستات عليهم الحاجات دي.
جيبار
:
لا أبدًا، دي أجمل من كل الستات اللي شفتهم.
عثمان
:
طيب وبعدين.
جيبار
:
وبعدين واحنا قاعدين بالشكل ده، وما أشعر إلَّا واستوب وراح واقف القطر،
واقف مرة واحدة.
عثمان
:
ليه؟ أتنقل من على الشريط؟
جيبار
:
لا بس كان الصنافور مقفول، وعلشان القطر ربط مرة واحدة، رحت محدوف على
صاحبتنا، ودا كان السبب في جرِّ الكلام ويَّاها.
عثمان
:
والله الصنافور دا خدمك عال، روح يا شيخ ربنا يجعل لك في كل خطوة صنافور؛
لأنك راجل طيب تستاهل صنافورات الدنيا والآخرة، وبعدين؟
جيبار
:
النهاية، فضلت أعتذر لها وهي تبتسم، وأنا أقرب لحد ما بقيت جنبها ورحت
ماسكها من دراعها مسكة لكن بظرف …
عثمان
:
وهي سكتت على كده؟
جيبار
:
اللي أنا مندهش له إنها سكتت.
عثمان
:
وبعدين؟
جيبار
:
وبعدين يا سيدي، ما أشعر إلَّا واستوب وراح القطر رابط مرة واحدة.
عثمان
:
إيه صنفر تاني؟
جيبار
:
لا وصلنا المحطة اللي حانزل فيها.
عثمان
:
إخص دانت بختك وحش، ولكن برضك لما نزلت من القطر مشيت وراها
طبعًا؟
جيبار
:
مع الأسف ما أمكنيش؛ لأني لما نزلت من القطر رحت واقع.
عثمان
:
إخِّيه، على الأرض طبعًا؟
جيبار
:
لأ يا سيدي، على القومندان بتاعنا اللي مسك فيَّ زي العلقة، وفضل يرغي معايَ
لحد ما اختفت عن نظري ولاعرفش راحت فين.
عثمان
:
يا مسكين طلع نقبك على شونة.
جيبار
:
يستحيل، أنا قلبي حاسس إني ضروري حاقابلها وأشوفها؛ لأن نظراتي أثَّرت
فيها، لا ولا تنساش إن الفضل في استلفات نظرها لي كان …
عثمان
:
للصنافور طبعًا.
جيبار
:
لا، للبدلة الرسمية اللي أنا لابسها.
عثمان
:
عال، مبروك مقدمًا.
جيبار
:
مرسي، ودلوقت أما أروح أمر في القشلاق لأني نوبتشي الليلة (يخرج).
عثمان
:
مسكين جيبار على نيَّاته، فاكر إن دي ست من عائلة، دي لازم واحدة من
الجماعة إيَّاهم ورايحة المعسكر بتاعها.
برنسيس
(داخلة)
:
مرسي يا أونباشي، مرسي.
عثمان
:
آه، برنسيس؟
برنسيس
:
آه، بونجور فيكونت.
عثمان
:
بونجور، إنت جيتي؟
برنسيس
:
أيوه يا سيدي، وأظن موش أنا اللي بتنتظرها جنابك؟
عثمان
:
ليه بقى؟
برنسيس
:
أنا عارفة كل شيء، إنت لك متريس.
عثمان
:
أنا؟ أبدًا.
برنسيس
:
بلاش كدب، دي هي اللي كنت بتنتظرها في المحل بتاعي، وعلشان كده سكيت
عليَّ
عثمان
:
لا، أبدًا. دي كانت مرا، الله الله، أنا أحلف لك إني ماليش متريس
أبدًا.
برنسيس
:
مصدقاك يا عزيزي، ودلوقت خلاص راح كل الزعل، وكمان علشان أثبت لك إني موش
زعلانة منك حاقعد كام يوم معاك هنا.
عثمان
:
عال، برافو (لنفسه) الحمد لله اللي
مراتي في انجوليم … بس للأسف يا عزيزتي الستات مابيناموش هنا في القشلاق،
ولازم آخد تصريح من جناب القومندان.
برنسيس
:
لا ماتفتكرش، أنا أطلب لك التصريح بنفسي.
عثمان
:
أنت تطلبيه؟ لا أبدًا.
جيبار
(وهو داخل)
:
طيب طيب.
عثمان
:
جيبار؟
جيبار
:
إيه؟ إنت شرفتِ يا مدام عثمان، حمد الله على السلامة.
برنسيس
:
مرسي (على حدة) دا لسه فاكرني مراة
عثمان؟
جيبار
:
أما مفاجأة غريبة!
برنسيس
:
ليه؟
جيبار
:
لأن عثمان ماكانش منتظر جنابك.
برنسيس
:
لا ماهو حاكم أنا ما أقدرش على بُعده.
عثمان
:
أيوه ماتقدرش على بُعدي!
جيبار
:
طبعًا، وكمان جاية تُطبِّي عليه على غفلة.
عثمان
:
أيوه عليَّ، على غفلة.
جيبار
:
وانت لازم مبسوط قوي من الزيارة دي يا فيكونت؟
عثمان
:
أمَّال، أنا حافرقع من كتر الانبساط، ودلوقت اتفضلي يا حبيبتي، على
اللوكاندة اللي أنت نازلة فيها وأنا محصَّلك حالًا.
برنسيس
:
عظيم، أنا نازلة في أوتيل دي باري نمرة الأودة ١٧١.
القائد
(من الخارج)
:
استعدوا للسفر بالليل. البسوا ملابسكم الحربيَّة. السفر الساعة ٦.
عثمان
:
جناب القومندان، اتداري وراي.
القائد
(يدخل)
:
آه مسيو جيبار، أنت هنا؟
جيبار
:
فيه أمر يا جناب القومندان.
القائد
:
إيه ده؟ واحدة ست في المعسكر، مين الست دي؟!
جيبار
:
دي المدام، جات علشان تشوف جوزها. يا فيكونت قدِّم الست بتاعتك لجناب
القومندان.
القائد
:
لا، مافيش لزوم، كفاية إنك عرفتني بها، أنا سعيد جدًّا يا مدام اللي
تشرفت بمعرفتك.
عثمان
:
الله الله! بردون يا جناب القومندان، دي …
القائد
:
الست بتاعتك، في غاية الجمال يا فيكونت، أظن جنابك ما زرتيش أبدًا قشلاق
زي ده قبل دلوقت؟
برنسيس
:
لأ، أبدًا.
القائد
:
تسمحي إنك تتفرجي عالقشلاق ده، وأنا أتشرف إني أكون دليلك وترجمانك في
الفرجة اللطيفة دي.
برنسيس
:
بكل ممنونية.
عثمان
:
دا باين حايلزق يا أخ؟
جيبار
:
لا مؤاخذة، أنا مشغول في النوبتشية، عن إذنكم (يخرج).
القائد
:
تسمح يا فيكونت، إني آخد المدام علشان أفرجها.
عثمان
:
لأ، يا جناب القومندان، أنا ماسمحش.
القائد
:
إنك تتعبني، لا مافيش تعب ولا حاجة، وكمان علشان أعرَّفها بكل إخوانك،
اتفضلي يا مدام (يخرجان).
عثمان
:
عال عال، لا والمصيبة إنه عايز يعرَّفها بكل إخواني، بس إياك ماتغلطش قدامه
وتفهمه الحقيقة، الحمد لله لحسن حظي إن مراتي كلاريت في انجوليم. النهاية
أما أخش المكتب نهيص شوية، أنا عارف دي صدفة إيه دي (يخرج).
كلاريت
(داخلة)
:
مرسي يا جناب الأونباشي مرسي، اتفضل انت. آه، دا عثمان جوزي لازم حايندهش
قوي من المباغتة دي، أيوه لأني لما رحت انجوليم مالقتش خالتي؛ لأنها سافرت
على نيس بسبب عيا جوزها بالروماتيزم؛ ولذلك فضَّلت إني أجي هنا أحصَّل جوزي.
بيقولوا المكتب هنا، يا ترى فين هو؟
جيبار
(داخلًا)
:
الله، واحدة ست ثانية؟!
كلاريت
:
آه، دا الظابط اللي كان ويايَ في القطر، لازم هو اللي يدلني.
جيبار
:
مدام، آه حضرتك شرفت؟ أنا برضه كان قلبي حاسس إنك لازم حاتيجي هنا علشان
تشوفيني؟
كلاريت
:
لا بالعكس يا مسيو، أنا جيت علشان أسأل عن الفيكونت عثمان.
جيبار
:
عثمان!
كلاريت
:
جنابك تعرفه؟
جيبار
:
إزاي ما اعرفوش، دا أعز صديق ليَّ.
كلاريت
:
عال عال، من فضلك قول لي هو فين؟ أنا مستعجلة قوي علشان أشوفه.
جيبار
(لنفسه)
:
تشوفه! آه دي لازم المتريسة بتاعته القديمة، لكن حايعمل إيه في مراته
اللي هنا دلوقت؟
كلاريت
:
هيه، موش تتكرم عليَّ جنابك وتدي له خبر إن فيه واحدة ست عايزة
تقابله؟
جيبار
:
لا، يستحيل يا مدام.
كلاريت
:
ليه، هو خرج؟
جيبار
:
لا، أيوه، أنا موش عارف خرج ماخرجش.
كلاريت
:
بتقول إيه؟!
جيبار
:
باقول موش ممكن تشوفيه، وأحسن شيء تتفضلي من هنا دلوقت.
كلاريت
:
أتفضل؟ ليه؟
جيبار
:
عاوزه تعرفي ليه؟
كلاريت
:
طبعًا.
جيبار
:
لأنه مع الست بتاعته، مع مراته.
كلاريت
:
مراته!
جيبار
:
أيوه مراته، واحدة في غاية الجمال. قدِّمني لها واحنا في باريز، وأهي جات
النهارده تقضِّي الثمانية وعشرين يوم ويَّاه. وأحسن طريقة إنك تتفضلي دلوقت من
هنا؛ لأن القومندان بيفرجها على المعسكر وراجعين تاني.
كلاريت
:
أنت بتفتكر إني أروح من هنا أحسن.
جيبار
:
ودي بدَّها كلام، والَّا يعني عاوزة تعملي فضيحة للراجل؟
كلاريت
:
فضيحة، ها ها ها.
جيبار
:
طيب، انتظري على الأقل لما مراته تسافر، وفي الوقت ده يصح …
كلاريت
:
مراته (على حدة) دي لازم المتريسة
بتاعته، الَّا مراته دي كمان!
جيبار
:
ومزعلة روحك قوي كده ليه؟ هو مافيش حد غير عثمان في الدنيا؟
كلاريت
:
لحسن الحظ فيه كتير.
جيبار
:
موش كده (على حدة) أمَّا أجتهد إني
أخلصها من عثمان. أمَّال بدك إيه ياما حاجات بتحصل، أهه كان بيحبك في الأول،
لكن دلوقت بيحب مراته ويعبدها، وإذا سمعتِ كلامي تسيبك منه وتنسيه.
كلاريت
:
أنساه؟
جيبار
:
أيوه انسيه، دانا أساعدك إذا حبيتي؛ لأني من ساعة ماشفتك في القطر وأنا
مافيش في فكري غيرك.
كلاريت
(على حدة)
:
حيث كده لازم أنتقم من عثمان، آه يا عزيزي دانا كمان من ساعة ماشفتك
حبيتك، استلطفتك قوي.
لحن
جيبار
:
يا هلترى يا حياة الروح
حايتنصف قلبي في هواك
والا تفوتيني أسير النوح
وتبخلي عليَّ برؤياك
كلاريت
:
أنا اللي يحفظ لي ودادي
أفتح له مهجتي وفؤادي
جيبار
:
وأنا الوفا دين عندي وملة
خاضع لحبك مهما يكون
غرام شريف لا غرض ولا علة
وكل غالي علشاني يهون
شبابي أوهبه في الدنيا دي
وأبيعه طايع لاجل اتنين
مرافقتي بالروح لبلادي
وحبك أنت يا نور العين
عثمان
(داخلًا)
:
إنت هنا يا عزيزي؟
جيبار
:
أيوه أنا و…
عثمان
:
إيه كلاريت، ودي إيه اللي جابها هنا دلوقت؟!
كلاريت
:
بونجور فيكونت، إزاي صحتك، موش مبسوط؟
عثمان
:
أنا … أأ، أيوه … قوي، لأ لأ.
جيبار
:
خليك تقيل، أنا صلَّحت لك المسألة.
عثمان
:
مرسي يا عزيزي، أنا ممنون.
جيبار
:
لا، كن مطمئن يا فيكونت، أنا فهِّمت المدام إن وجودها هنا موش
مناسب.
عثمان
:
إيه موش مناسب؟!
كلاريت
:
أيوه يا سيدي، صاحبك ده فهِّمني إن مراتك الشرعية عندك هنا.
عثمان
:
يخرب بيتك، يخرب بيتك، إنت اللي قلت لها كده؟
جيبار
:
أيوه يا أخي علشان أصلح لك المسألة، وأخلِّي مراتك ماتشوفهاش.
عثمان
:
تصلح لي إيه، وتزفت لي إيه؟
كلاريت
:
هيه، إيه رأيك؟ موش أروح من هنا دلوقت، أحسن يالَّه السلامة؟
عثمان
:
لا لأ، جيبار دا واحد مايفهمش معنى الكلام اللي بيقوله.
جيبار
:
أوه، لا يا عزيزي، ما تنساش إنك بتكلم رئيسك هنا. اسمعي يا عزيزتي، أنا
حافهمك المسألة.
عثمان
:
إيه، حاتصلح حاجة تاني؟
كلاريت
:
من فضلك سيبه يتكلم، إحنا موش معرفة دلوقت.
عثمان
:
يعني إيه؟
كلاريت
:
يعني سيبه خلِّيه يشرح ويفهمني كل شيء؛ لأنه كان زميلي في القطر وإحنا
جايين على هنا.
عثمان
:
زميلك في القطر؟! هي دي حضرتها الست بتاعه الصنافور؟! هي دي اللي مسكتها من
دراعها؟!
جيبار
:
أيوه يا سيدي، وأنت مالك.
عثمان
:
إزاي تمسك مراتي من دراعها إزاي؟
جيبار
:
مراتك؟!
عثمان
:
أيوه مراتي، مراتي الحقيقية … بس من فضلك بلاش فضيحة؛ لأن جناب القومندان
إذا عرف إن التانية موش مراتي حايخلي وقعتي زي الطين.
جيبار
:
ها ها ها، كويس قوي، غرضك يعني تمنعني عن مغازلتها، وعلشان كده عايز
تبلفني وتفهمني إنها مراتك؟
عثمان
:
دانت مصيبة أعوذ بالله، ما تقولي له يا ست إنك مراتي.
كلاريت
:
أنا ما أحبش الكدب، مراتك الحقيقية اللي جات هنا قبلي.
جيبار
:
إيه رأيك بقى؟
عثمان
:
إزاي تنكري إنك مراتي؟ ماتصدقهاش دي مراتي وستين مراتي كمان.
جيبار
:
ماتتعبش نفسك، من فضلك يا مدام قولي الحقيقة.
كلاريت
:
الحقيقة إني موش مراته زي ما قلت جنابك.
عثمان
:
يا ولية خلِّي عندك ذمة.
جيبار
:
بزيادة بقى؛ لأنها لو قالت لي بعد كده إنها مراتك، موش حاصدقها كمان
(يسمع صوت القائد) آه
القومندان.
عثمان
:
يا ساتر يا رب يا ساتر.
كلاريت
:
وويَّاه مدام عثمان أهه، أمَّا أروح أقابلها أنا.
عثمان
:
لا إعملي معروف، لحسن دا راجل شديد إستخبِّي.
كلاريت
:
أستخبَّى يستحيل.
جيبار
:
أيوه له حق، استخبي هنا في المكتب.
كلاريت
:
طيب أنا برضه حاستخبَّى، لكن يكون في معلومكم إني لازم أنتقم لنفسي.
عثمان
:
أيوه استخبي وبعدين أبقى انتقمي لنفسك زي ما انت عاوزه (تدخل المكتب، يدخل القائد وبرنسيس ويقف عثمان وجيبار
أمام المكتب).
القائد
:
أنا أوصيك إنك تحتمي على جوزك، مايشتريش بضاعة إلَّا من المحل اللي وصفته
لك.
برنسيس
:
أيوه يا جناب القومندان، إن شاء الله موش راح ناخد حاجتنا إلَّا من المحل
ده.
القائد
:
عال عال (على حدة) … أدي احنا ضمنا
زبون للمحل … آه، إنت هنا يا فيكونت؟
عثمان
:
أيوه يا جناب القومندان، أنا … هنا … لأني وأنا فايت من هنا لقيت نفسي
هنا.
القائد
:
وانت كمان يا جيبار؟
جيبار
:
أيوه برضه، أنا كنت فايت من هنا.
القائد
:
لقيت نفسك هنا زيه موش كده؟ أنا عرَّفت الست بتاعتك للأورطة كلها.
عثمان
:
تشرفنا.
برنسيس
:
وجنابه صرَّح لك تنام في البلد ما دمت أنا ويَّاك.
عثمان
:
أهه دا اللي ناقص.
جيبار
:
والثانية اللي جوه دي (على
حدة).
عثمان
:
ما هو تصليحك.
القائد
:
ودلوقت موش فاضل إلَّا مخازن المهمات، تتفرجي عليها؟
برنسيس
:
بكل ممنونية.
القائد
:
قول لي يا جيبار.
عثمان
:
نعم.
القائد
:
اليوزباشي بيبن قال لي إن فيه واحد غايب من غير أجازة.
جيبار
:
أيوه صحيح، واحد اسمه بنوا، والبدلة بتاعته أديتها لك يا فيكونت، أظن في
المكتب.
عثمان
:
أيوه، أهه جوه في المكتب.
القائد
:
ودا ماجاش لحد دلوقت ولا عندوش أجازة؟
جيبار
:
أيوه يا جناب القومندان.
القائد
:
أما غبي، أول ما يجي ودِّيه عالسجن، ثمان تيَّام سجن.
جيبار
:
حاضر يا جناب القومندان.
القائد
:
أيوه لأن التقصير في واجب الخدمة جريمة ما يصحش تُغتفَر. لا مؤاخذة يا مدام، الخدمة لها
واجبات.
برنسيس
:
معلوم يا جناب القومندان.
عثمان
:
أما أجتهد إني أوزعها. بردون يا جناب القومندان، الست بتاعتي لازم تكون
دلوقت تعبانة، ويلزمها …
القائد
:
لا يا فيكونت، أنا لسه مافرجتهاش على مخازن المهمَّات.
عثمان
:
لكن أنا …
القائد
:
ولسه كمان ما اتفرجتش عالإسطبلات.
برنسيس
:
إسطبلات؟ أيوه أنا أدوب في الخيل.
القائد
:
هيه، أهه بتحب الخيل يا فيكونت، إيه رأيك؟
عثمان
(لنفسه)
:
أيوه وعلشان كده بتحبني أنا راخر، لكن يا جناب القومندان …
القائد
:
آه، إنت لازم غاير مني، لا ما يكونش عندك فكرة، الست بتاعتك حاتتفرج
وتيجي حالًا، إنت فهمت عقاب بنوا، لازم يكون عقاب بالجملة فاهم؟
عثمان
:
أيوه بالجملة، ولاتنساش تنزيل المية عشرة.
القائد
:
على السجن على طول أول ما يجي، خليك فاكر بنوا (تدخل كلاريت بملابس عسكري).
كلاريت
:
أفندم، حد بينده على بنوا.
جيبار
:
آه.
عثمان
:
إخص، مراتي لابس عسكري!
القائد
:
إنت بنوا؟
كلاريت
:
اسأل جناب الفيكونت، هو يعرفني طيب إذا كنت بنوا والَّا لأ؟
عثمان
:
رأيه بنوا قوي، هي دي بدَّها كلام، يا نهار أسود.
القائد
:
أمَّال بتقول إنه غايب ليه؟
جيبار
:
لا، ما هو عثمان اللي قال لي …
عثمان
:
أيوه، أنا اللي قلت له، بس دا سهو مني، لازم أنا ناسي.
القائد
:
هيه، وجود الست بتاعتك طيَّر عقلك أنا عارف.
عثمان
:
حايصلح زيك راخر.
القائد
(لكلاريت)
:
كويس خالص، إنت جاي دلوقت علشان تتخلص من عقابك اللي بالجملة.
كلاريت
:
عقابي أنا!
القائد
:
بس، موش عاوز منك تفسير ولا معارضة.
عثمان
:
معلهش يا خوي بلاش دلوقت تفسير ولا معارضة من فضلك.
القائد
:
وبما أنه ظهر إنك جيت قبل دلوقت، واتأخرت شوية صغيرة حاديلك خمسطاشر يوم
نوبتشية باستمرار. يالَّه يا جيبار نفِّذ الأمر ده.
عثمان
:
تعالي يا ستي، إنت اتجننت والَّا إيه، إيه البدلة اللي أنت لابساها
دي؟
كلاريت
:
علشان أكون جنبك، ولازم نمضي الثمانية وعشرين يوم بتوعك سوا.
جيبار
:
لكن وجودك هنا بالشكل ده خطر عليك، يحكموا عليك بتلاتين يوم سجن.
كلاريت
:
زي بعضه.
عثمان
:
واحنا كمان يحكم علينا زيك.
كلاريت
:
أحسن.
جيبار
:
أحسن؟ لا أنا في عرضك تقلعي البدلة دي.
عثمان
:
لأ والمصيبة إذا جه بنوا صاحب البدلة.
كلاريت
:
وماله خلِّيه ييجي.
عثمان
:
الله لا يقدر.
بنوا
(داخلًا)
:
بردون موسيو.
عثمان
:
دا الحلواني، وجاي هنا ليه كمان؟
جيبار
:
يا مسيو حضرتك عاوز إيه؟
بنوا
:
أنا جيت علشان أمضي الثمانية وعشرين يوم بتوعي، أنا الحلواني
بنوا.
عثمان
:
إيه؟ اسمك إيه؟
بنوا
:
بنوا.
عثمان
:
يخرب بيتك، عجبك كده؟
كلاريت
:
والله جه في وقته.
جيبار
:
إيه العمل دلوقت؟
بيبن
(داخلًا)
:
فين العسكري اللي حكم عليه جناب القومندان بخمسطاشر يوم نوبتشية، آه لازم
هو ده؟
جيبار
:
أيوه هو.
بيبن
:
يالَّه عالنوبتشية.
كلاريت
:
مابلاش، مافيش لزوم للنوبتشية دي.
عثمان
:
أيوه علشان خاطري، والَّا خدوني أنا بداله.
بيبن
:
ليه يعني؟
عثمان
:
لأنه مراة … إخص؛ لأنه صاحبي قوي.
بيبن
:
لا، موش ممكن لازم هو اللي يستلم النوبتشية بنفسه، ياللا.
جيبار
:
لكن يا عزيزي …
بيبن
:
ما لكنش ولا حاجة، دا أمر القومندان ولازم يتنفذ. ياللا قدامي (يخرج).
عثمان
:
إنت جيت ليه يا أخي دلوقت؟ كنت في أنهي داهية؟
بنوا
:
كنت محجوز في قشلاق باريز بسبب خناقة حصلت لي إمبارح في دكان بتاع
برانيط.
عثمان
:
وهنا كمان أتحكم عليك بالحبس تمان تيام، ولازم تتحبسهم.
جيبار
:
أيوه صحيح، حكم عليك القومندان بتمان تيَّام سجن.
بنوا
:
أنا عملت حاجة؟!
عثمان
:
دانت عملت أزفت حاجة، دا تأخيرك ده ودَّانا في داهية.
جيبار
:
هو لا، اتنين عساكر قوام.
بنوا
:
طيب أدوني بدلتي.
عثمان
:
أوعى تجيب سيرة بدلتك، أحسن لو عرف جناب القومندان إنك ما استلمتهاش، راح
يديلك ٩٧ سنة سجن (يدخل اثنان من
العساكر).
جيبار
:
يالَّه خدوا البقف دا ودُّوه عالسجن حالًا.
بنوا
:
اعملوا معروف بلاش المرة دي.
عثمان
:
أيوه أيوه، جرجروه.
بنوا
:
يا ناس أنا مظلوم (يخرج مع
الجنديَّيْنِ).
عثمان
:
أيوه كده كويس، علشان القومندان مايشوفوش، ولا يعرفش بنوا الحقيقي، لكن
إيه الرأي بقى في مراتي؟
جيبار
:
لسه برضه بتقول مراتي؟
عثمان
:
يا جدع صدق جننتني (نفير) آه الطابور
(يدخل الجميع).
بيبن
:
كلكم موجودين، زنهار.
كلاريت
(داخلة)
:
واحد دون صحيح.
بيبن
:
إيه فيه إيه يا بنوا؟
كلاريت
:
فيه واحد عسكري كربسني على السلالم.
ميشونيه
:
هوَّ فين؟ أنت أزاي بتشتمني؟
كلاريت
:
شتمتك، وعاوز إيه؟
ميشونيه
:
عايز تشتمني كمان.
كلاريت
:
إنت جبان.
عثمان
:
أخ أخ، لا لا، مافيش لزوم.
جيبار
:
أيوه مافيش لزوم.
ميشونيه
:
أنا لازم أنتقم لنفسي.
كلاريت
:
تنتقم لنفسك؟ طيب خد بالمرة (تضربه
بالقلم).
بيبن
:
لا دي إهانة ما يحميهاش إلا الدم.
كلاريت
:
يعني دويللو، وهو كذلك.
بيبن
:
معلوم دا شيء أصول، وأنا حابلغ القومندان، استعدوا للدويللو (يخرج).
ميشونيه
:
دويللو! يادي الداهية، دويللو إيه وأنا راجل سباك لا أعرف دويللو ولا
دياولو؟!
عثمان
:
مابلاش الدويللو ده أنا في عرضك.
كلاريت
:
أبدًا، إنت عارف إني أشجع منه؛ لأني أتعلمت السيف والشيش كويس.
عثمان
:
إنت موش واخدة إلَّا على ضربي أنا بس.
جيبار
:
إيه مالك بترتعش كدا ليه؟
ميشونيه
:
أنا بارتعش؟ لا أبدًا، بس أنا موش مبسوط شوية من الدويللو ده.
برنسيس
(داخلة)
:
إنتو مسافرين دلوقت؟
جيبار
:
أيوه مسافرين دلوقت علشان المناورة.
بيبن
(داخلًا)
:
كل شيء انتهى، جناب القومندان قرَّر إن الدويللو يكون دلوقت حالًا (يُسلِّم كلًّا منهما سيفًا وتبدأ المبارزة على
اللحن).
الجميع
:
إهانة مالهاش غير الدويللو
وكل منهو يفش غلة
رجوع مافيش أهه السلاح موجود
رصاص وشيش ونعمل إحنا شهود
اتنديه خش عليه
أول ما نقول كومانسيه
ميشونيه
:
وأنا كان مالي ومال دي العركة
جي برجلي للموت ليه
بردون موسيه صلحة مباركة
أنا أبوس جزمة أبوك موسيي
الجميع
:
غلباوي بلاف
إخص عليك خوَّاف
عرِّيت الأشراف
عثمان
:
أنا عندي الأشراف تنعر
أحسن من يا شر اشتر
يمكن رمية
نطلع حامية
ينزل واحد منهم كر
عالأسعاف كوعك والبر
كلاريت
:
أسكت موش وقت كلام فارغ
ليحمرق حد ولا يزاوغ
الجميع
:
أسكت موش وقت كلام فارغ
ليحمرق حد ولا يزاوغ
كومانسيه، كومانسيه (مصارعة)
ميشونيه
:
أقل نغزة في قلبي
تودي عمري بلاش
أحط دولا في عبي
علشان ما احسبهاش
الجميع
:
كومانسيه، كومانسيه (مصارعة)
برنسيس
:
أهه سقط من طوله حرام يا هوه
في عرضكم هوُّوا له وفوَّقوه
عثمان
:
بطلوا له بمية باردة
وافتحوا له عنيه فردة فردة
وإن لزم رشوة بخردل
وادلقوا على وشه جردل
كلاريت
:
إسندوني الحقوني
شيء منمِّل جتِّتي
عثمان
:
لأجل بختي اتلبختي
ردِّي ياختي إيه العمل في حضرتي
الجميع
:
الصديري حلوا يا أخواتي الصديري
عثمان
:
الصديري لم يحله حد غيري
برنسيس
:
مستحيل دي مأمورية
بدها الأيد الطرية
الجميع
:
آه يا عيني آه يا وعدي
عالحاجات المستوية
ست لابسة عسكرية
عثمان
:
الحكاية حبشي بلشي
وأتوحل الباتشاويشي
ميشونيه
:
إيه جرى لي يا ترى
وإيش ملحقني هنا
كلاريت
:
حالتي مالها مكسرة
ما تقولوا لي فين أنا
الجميع
:
الدويللو انتهى
والإهانة شلتها
كل منهو خد حقوقه
صافحوا بعضكم بقى
ميشونيه
:
مسيو.
كلاريت
:
مسيو.
جيبار
:
البوري بيندهكم يا عساكر جاوبوه
والفرض اللي عليكم لبلادكم أدِّوه
ودُنْيتكم أنسوها ووطنكم افتكروه
بدماكم وشرفكم وبروحكم أفدوه
عثمان
:
مالي يا مالي وأنا كنت مالي واللي جرى لي
(انتهي الفصل الثاني.)
الفصل الثالث
(ترفع الستار عن صالون منقسم قسمين، عثمان وجيبار راقدان في القسم الشمالي.)
جيبار
:
آه يا فيكونت حب كلاريت دي حايجنني خالص.
عثمان
:
يا جدع اختشي على دمك، ماتقولش الكلام ده عيب عليك، دي الست بتاعتي.
مراتي.
جيبار
:
اعمل معروف بلاش كلام فارغ.
عثمان
:
يا أخينا باقول لك مراتي، كلاريت باسترو ومراة الفيكونت عثمان عبد الباسط.
جيبار
:
كلاريت باسترو، وإيه يعني لما يكون اسمها كده صحيح، لكن برضه المتريسة
بتاعتك، هو لما تكون اسمها كده، يعني لازم تكون مراتك؟
عثمان
:
يا حفيظ، دانت مصيبة.
جيبار
:
من فضلك أنا مش عايزك تقول لي من دلوقت إنها مراتك، يا راجل عيب عليك،
إنت متجوز.
عثمان
:
يا سيدي ما هي دي الست اللي أنا متجوِّزها.
الخادمة
:
اتفضلوا من هنا، أهي دي الأودة اللي كلِّمتكم الست عنها.
القائد
:
لكن دي أودة وحشة قوي.
بيبن
:
هو فيه محل لسكن العساكر أحسن من كده.
القائد
:
لكن ما عندكوش أودة غير دي؟
الخادمة
:
لا مافيش غير الأودة الخصوصية بتاعة الست.
القائد
:
عظيم تعالى ورِّيني أودة الست (يخرج)
إلَّا قولي ستك دي عمرها كام سنة؟
الخادمة
:
ما يجيش تسعين.
القائد
:
إخص، لا مافيش لزوم للأودة دي.
الخادمة
:
آه، اسمعوا فيه كمان أودة عم المدام، أودة حلوة قوي وفيها سرير مفروش
كويس.
القائد
:
ولا فيش حد نايم فيها؟
الخادمة
:
لأ مافيهاش حد؛ لأن عم الست مسافر.
بيبن
:
وأنا حاستنَّى هنا، بس هاتي لي مخدة علشان أحب راسي تكون عالية.
الخادمة
:
أجيب لك مخدة حالًا (تخرج).
بيبن
:
أهو أنا ما يضايقنيش إلَّا عدم الراحة في النوم.
الخادمة
(تدخل ومعها كلاريت)
:
اتفضل المخدة أهه، وآدي زميلك اللي حاينام ويَّاك في السرير.
بيبن
:
حد حاينام معاي في السرير ده؟ إيه هو أنت يا بنوا؟
كلاريت
:
أيوه يا جناب اليوزباشي … إخص دنا كنت فاكرة إنها أودة فاضية (تهمُّ بالخروج).
بيبن
:
لا لا، تعالى يا بنوا.
كلاريت
:
لا مرسي، مايصحِّش أضايقك في النوم.
بيبن
(لنفسه)
:
لا مافيش مضايقة ولا حاجة، تعالى تعالى والسلام.
الخادمة
:
هي ماحصلتش إن راجلين يناموا ويَّا بعض.
كلاريت
:
لا يستحيل يا جناب اليوزباشي، ما يناسبش إن واحد عسكري زيي، ينام ويَّا واحد
ظابط كبير زي حضرتك.
بيبن
:
أقول لك، حتى الأودة دي ساقعة موش عاجباني، ويصح إني أسيبها لك
لوحدك.
كلاريت
:
أوه مرسي.
بيبن
:
مافيش أودة غير دي.
الخادمة
:
مافيش إلَّا أودتي أنا.
بيبن
:
لازم أودتك دي دفا عن هنا، تعالي وريهالي تعالي.
الخادمة
:
حاضر، اتفضل (تخرج وبيبن).
كلاريت
:
يا حفيظ دنا تعبت قوي، الله يكون في عون الرجالة، لا لا شغلة العسكرية دي
ماتوافقش الستات أبدًا.
الخادمة
:
اتفضل من هنا يا حضرة السواري.
كلاريت
:
إيه فيه إيه؟
ميشونيه
:
آه، بنوا.
كلاريت
:
ميشونيه.
الخادمة
:
إنتو تعرفوا بعض؟
ميشونيه
:
إلَّا نعرف بعض، قوي.
الخادمة
:
كويس خالص. بقى حضرته معاه تصريح علشان ينام هنا الليلة، واحنا ماعندناش
فاضي إلَّا الأودة دي.
كلاريت
:
الأودة دي موش فاضية، أنا خدتها علشان أنام فيها.
ميشونيه
:
طيب وماله، ما دام اصطلحنا مفيش مانع إننا ننام الليلة دي سوا.
الخادمة
:
دا حتى أحسن، لما تناموا مع بعض، تدفُّوا بعض أكتر.
كلاريت
:
لا لا، موش ممكن.
ميشونيه
:
موش ممكن ليه يا أخي؟
الخادمة
:
طيب وحانعمل إيه؟ إنت ماعندكش تذكرة تصريح علشان تنام هنا، لكن جنابه
معاه.
ميشونيه
:
إيه؟ مامعكش تصريح كمان؟!
كلاريت
:
لا معاي، لكن علشان أنام عند واحد خياط، ولما رحت لقيته منيِّم العساكر
كلهم في أودة واحدة؛ فاضطريت إني أجي أنام هنا.
ميشونيه
:
لكن أنا التصريح بتاعي إني أنام في البيت ده، تقوم إنت تمنعني؟
كلاريت
:
وأنا يستحيل أفوت الأودة دي.
ميشونيه
:
يا سلام، دا تلم قوي بنوا ده، الغاية مرسي يا مدموازيل، اتفضلي
انت.
الخادمة
:
طيب اتفقوا مع بعض (تخرج).
ميشونيه
:
أنا ماكنتش منتظر أبدًا إنك حاتكون الليلة زميلي في النوم.
كلاريت
:
يعني أنا اللي كنت منتظر!
ميشونيه
:
أقول لك الحق، أنا موش مبسوط من نومي ويَّاك.
كلاريت
:
ولا أنا.
ميشونيه
:
أيوه؛ لأن القلم اللي ضربته لي، لسه بيحرقني لحد دلوقت.
كلاريت
:
يا سيدي سيبك، اللي فات مات.
ميشونيه
:
لك حق، المسامح كريم، وحيث إننا حانسافر بكرة الساعة ٦، الأحسن إننا ننام
من دلوقت (يقلع هدومه).
كلاريت
:
إيه، إنت بتعمل إيه؟
ميشونيه
:
باعمل إيه؟ باقلع هدومي.
كلاريت
:
بتقلع قدامي ماتختشيش؟!
ميشونيه
:
ألَّا اختشي دي كمان! يالَّه يا شيخ اقلع هدومك انت راخر.
كلاريت
:
أقلع؟ أقلع قدَّام راجل يستحيل!
ميشونيه
:
قدام راجل؟ أمَّال عايز تقلع قدام مرة؟! هاهاها.
كلاريت
:
ميشونيه، احفظ مركزك.
ميشونيه
:
بلاش كلام فارغ، أنا بدِّي أنام.
كلاريت
:
الحق عليَّ اللي فت بيت الخيَّاط، وجيت هنا.
ميشونيه
:
بنوا.
كلاريت
:
مالك؟
ميشونيه
:
جرى لك إيه يا أخي؟ إنت حتنام والَّا لأ؟ يالَّه أن كنت حاتنام، تعالي نام
من جوَّه، وأنا علشان خاطرك حنام من الناحية دي، مبسوط يا سيدي؟
كلاريت
:
لا مرسي أنا موش جاي لي نوم الليلة، ويمكن إذا نمت جنبك موش حاتعرف تنام،
وعلشان كده أنا حاقعد على الكرسي ده، لحد ما يطلع النهار.
ميشونيه
:
على كيفك بنسوار (ينام) يا سلام
الدنيا برد قوي، ما تيجي يا أخي ندفِّي بعض مايبقاش عقلك فارغ، تعالى السرير
واسع أهه يسعنا إحنا الاثنين.
كلاريت
:
لا مرسي، خد راحتك انت، أف، يا سلام فيه ريحة وحشة هنا، أما أفتح الشباك
ده، علشان تطلع منه الريحة (يفتح
الشباك).
ميشونيه
:
إيه ده، أنت بتعمل إيه؟!
كلاريت
:
بافتح الشباك علشان فيه ريحة بطَّالة هنا.
ميشونيه
:
إنت عاوز تجيب لي الزكام (يعطس) كده
يا سيدي عجبك، من فضلك أقفل الشباك.
كلاريت
:
يعني عاوز تموتنا فطيس.
ميشونيه
:
أوه، دا شيء موش كويس، شيء يضايق، أنا موش عاوز إن الشباك ده ينفتح،
فاهم والَّا لأ (يقفل الشباك).
كلاريت
:
إيه المضايقة دي.
ميشونيه
:
خلينا أصحاب، تعالى نام بدال ما تقعد تقلق منامي.
كلاريت
:
أنا ما أحبش أنام ويَّا حد في سرير واحد.
ميشونيه
:
طيب يا سيدي، اتفضل حضرتك نام في السرير لوحدك.
كلاريت
:
وانت؟
ميشونيه
:
أنا حانام على الكرسي ده، أقله أخلص من دوشتك.
كلاريت
:
طيب، إذا كان كده معلهش، أنا حتى حانام بهدومي (تنام).
ميشونيه
:
أما مصيبة دي، بقى الواحد ينام على كرسي وفيه سرير للنوم، لا أنا لازم
أشتكي للقومندان، لو كانت الدنيا حر، كان معلهش، إلَّا الدنيا برد والواحد
مثلج (يعطس) أهه كده، مانيش خالص من
الزكام في سنتي، لا سيبك، أنا حاطلع أنام في السرير جنبه … أيوه أهه
نام.
كلاريت
:
يا خبر، إيه ده حرامي!
ميشونيه
:
لا لا دانا.
كلاريت
:
إنت، ياللا انزل من السرير بلاش مسخرة (تدفعه
فيقع على الأرض).
عثمان
(ينظر)
:
إيه، كلاريت! (يخرج).
كلاريت
:
أما أروح أشوف لي أودة ثانية أنام فيها (تخرج).
ميشونيه
:
أنا مالي، يا سلام، أهه أنا دلوقت حنام حتة دين نومة، ولا ضرب المدافع
يصحيني.
عثمان
:
أيوه هي الأودة دي مظبوط، هي نامت والَّا إيه؟ أصحيها؟ أما إذا صحيتها
حايبقى حتة دين مناورة، قبل كل شيء نبوس إيدها الحلوة أولا، والَّا أحسن
نبوسها هي علشان تبقى مباغتة عظيمة (يقبل
ميشونيه).
ميشونيه
:
إيه ده، إيه ده، الفيكونت؟!
عثمان
:
ميشونيه؟ إنت بتعمل إيه هنا؟!
ميشونيه
:
أنا نايم يا جناب الفيكونت.
عثمان
:
فين بنوا أمَّال؟
ميشونيه
:
بنوا راح يشوف له أودة ثانية ينام فيها؛ لأنه مارضيش ينام جنبي.
عثمان
:
طيب من فضلك روح شوفه لي أحسن عاوزة.
ميشونيه
:
يعني إن لقيته نايم أصحِّيه؟
عثمان
:
أيوه.
ميشونيه
:
الغاية أما أستعد للروسيات وأمري لله، أقول لك أنا حانده له من هنا أحسن،
إنت يا بنوا، يا مسيو بنوا.
كلاريت
:
إيه مالك؟ فيه إيه؟
ميشونيه
:
لا بس، دا الفيكونت عاوزك.
كلاريت
:
الفيكونت!
عثمان
:
أيوه تعالى لي يا بنوا أحسن أنا عايزك.
ميشونيه
:
عن إذنك أنا راح أنام ثاني.
عثمان
:
حايضايقنا البقف ده … إنت إزاي تنام كده يا بارد، وتسيب ولد شاب زي ده من
غير نوم؟
ميشونيه
:
وأنا حاعمل له إيه، ما قلت له تعالى نام جنبي مارضيش.
عثمان
:
لكن دا موش ذوق، إنت لازم تسيب له السرير، وتروح تشوف لك محل ثاني تنام
فيه.
ميشونيه
:
زي بعضه، يتفضل ينام، أنا أروح أنام لي على كرسي في الأودة الثانية دي،
القصد أنام والسلام (يخرج).
عثمان
:
كلاريت إيه الرأي؟ عاجبك كده؟ يخلصك الحالة اللي فيها دي؟ دا موش كويس،
أنا لا باكل، ولا باشرب، ولا بانام.
كلاريت
:
أحسن، علشان أنتقم منك.
عثمان
:
لكن أنا خايف لتنكشف العبارة، وتبقى فضيحة.
كلاريت
:
أحسن.
عثمان
:
أحسن بعدين يحبسوك، ودا يبقى عيب في شرفي.
كلاريت
:
برافو، وأنا عاوزه كده.
عثمان
:
عاوزه كده إزاي، عايزة تحطي في شرفنا رقعة طول العمر، الناس تقول إيه؟
مراة الفيكونت فيفاريل اتجننت، دا شيء موش كويس أبدًا.
كلاريت
:
ويعني إذا الشيء دا حصل، يغيظك قوي؟
عثمان
:
طبعًا يغيظني قوي.
كلاريت
:
وأنا عاوزه اللي يغيظك قوي.
عثمان
:
ما بيغظنيش، ولافيش لزوم.
كلاريت
:
ويعني انت كان فيه لزوم، لما وزَّعتني على بيت خالتي، وخدت لك متريسة تقعد
ويَّاك ثمانية وعشرين يوم.
عثمان
:
أنا ماعنديش متريسة، دي هي الملعونة اللي خدت لها متريس.
كلاريت
:
برضه، وأنا لازم أجرسك وأهتكك، علشان تعرف إن اللي يخون مراته اللي يجرى
عليه.
عثمان
:
عندك حق، ولكن أرجوك تسامحيني.
جيبار
:
يا خواتي الخوتة اللي جنبنا دي، الواحد موش عارف ينام له شوية؟ أمَّال
عثمان فين؟
عثمان
:
اعملي معروف اقلعي الهدوم دي، والبسي هدومك ومن بدري روحي عند خالتك في
انجوليم.
جيبار
:
الله، ده زي صوت عثمان … مظبوط هو وويَّاه المتريس بتاعتنا إحنا
الاثنين.
عثمان
:
كلاريت، أنا في عرضك (يخرج
مسرعًا).
كلاريت
:
مستحيل باقول لك.
عثمان
:
كلاريت، بصفتك عسكري، وأنا باشجاويش، أأمرك.
كلاريت
(تضحك)
:
طيب يا سيدي، أسمع أوامرك العسكرية اللي تختص بالخدمة بس، ولكن الأوامر
اللي خارجه عن الخدمة، يستحيل أنفِّذها.
عثمان
:
طيب أربع تيام حبس ويَّاي في أودة واحدة.
كلاريت
:
إنت اتجننت والَّا إيه؟!
عثمان
:
بعدين تشوفي، أنا لازم أفرَّجك.
جيبار
(داخلًا)
:
الله! إنت مجنون والَّا إيه؟ بتهدد واحدة ست، أنا لازم أجعل الست دي تحت
حمايتي.
عثمان
:
لا يا جيبار ماتتداخلش من فضلك، أنا مافيش عندي غير كلمة واحدة أقول لها
لك، العمل اللي بتعمله ده عمل سافل.
جيبار
:
بس بلاش كلام فارغ، أنا لازم أحميها لأنك أنت ما تعرفش قيمتها.
كلاريت
:
أما قليل الأدب (يضرب جيبار
بالقلم).
ميشونيه
:
إرمي، بيقلم كمان لواحد ظابط، يا بوليس، يا عسكر يا جماعة يا اللي معانا
(يمنعه جيبار وعثمان من
الصريخ).
كلاريت
:
إخص، أنا عملت كده ليه؟
جيبار
:
ما تسكت يا أخي، إنت حد ضربك يا بارد.
ميشونيه
:
لا بس انت صعبان علي.
بيبن
(يدخل ومعه جندي)
:
إيه جرى إيه يا جماعة؟
عثمان
:
مافيش حاجة.
جيبار
:
أيوه مافيش حاجة أبدًا.
ميشونيه
:
لا يا جناب اليوزباشي، دا العسكري بنوا ضرب الظابط جيبار بالقلم.
بيبن
:
ضرب جيبار؟ صحيح يا جيبار؟
عثمان
:
لا أبدًا … أنت حسيت بحاجة يا عزيزي؟
جيبار
:
أبدًا.
ميشونيه
:
إزاي ده؟! دنا شايفة بعيني، وسامع رنَّته بودني، أما غريبة!
بيبن
:
كويس، يالَّه خدوه احبسوه في الكشك اللي في الجنينة.
كلاريت
:
إيه بتقول إيه؟ أنا أتحبس؟
بيبن
:
يعني هوَّ انت جعيص عالحبس … يالَّه.
كلاريت
:
إيه بتزق كمان؟ (تضربه).
ميشونيه
:
إخص كمان لزق اليوزباشي، عال، مابقاش فاضل إلَّا القومندان، يا شاويش
(يدخل الجميع ويقولون اللحن
الختامي).
عثمان
:
خير إيه جرى إيه الدوشة دي إيه
لازم تقولوا زعيقكم ليه
أوعك تقول إنه هنا
عند الجيران موش عندنا
داحنا في غاية الفرفشة
باين أهه على وشنا
جيبار
:
ومنين تجينا العكننة
ودا شيء على يدي أنا
زي العسل مع بعضنا
ولا حد رايق زينا
بيبن
:
ما ارجعش أنا عن فكرتي
في الأمر سر بذمتي
عساكر
:
ظاهر عليكو بتنكروا
والمسألة فيها نظر
ظابط يغشِّوه عسكره
دا شيء ماكانش منتظر
ميشونيه
:
سيدنا الفيكونت بزيه
ما تلطش بوكس في خلقته
عسكر
:
إيه إيه صاحب المقام المعتبر
يحصل له تهزيء يا خبر
البقف دا اللي استلبخه لازم نورِّيه العِبر
عثمان
:
ماحصلش حاجة في جتتي
حتى اكشفوا على صحتي
النفر دا هو أقبضوا عليه
جرجروه لجوه كلبشم إيديه
الجميع
:
له عقاب له عذاب
وقعته زي الهباب
سين وجيم تبقى الحكاية
زفت وتلبَّخ معاي
بس كان من اللي قال لك
تعملي لي له شاويشاية
يا حبيبتي يا ضناية
سلطة ملطة والنهاية
الجميع
:
شقلي بقلي هيلا هيه
طوله طبره ايلريه
(انتهي الفصل الثالث.)
الفصل الرابع
زيح الهم بشرب الكاس
وإنجلي مايهمكش الناس
اللي يغني يعيش متهني
واللي يحبِّكها ينداس
أدي الوسكي وأدي البيرة
يالَّه نفرفش يالَّه نزيط
حتة نتفة هيصة كبيرة
يلزمها رقص وتنطيط
ساعة للقلب وساعة للجيش
خفف عن نفسك بشويش
إبسط روحك واترك نوحك
دي الدنيا لا فيش ولا عليش
زي ما توفي حق السيف
والعمر تضحية علشانه
افهم إن الحظ دا كيف
وأهه آن لك دلوقت أوانه
اسكر وافرح وارقص وامرح
دا التفريح الرك عليه
بيبن
(بعد اللحن داخلًا)
:
هيه يعني عايزين تفضلوا تفلقوا في قلبكم لحد ما يجي ميعاد السفر، مايبقاش
فيكم نفس، ولا تقدروش تسافروا.
عثمان
:
والله لك حق، خلي كل واحد في غلبه، بلا مغنى بلا كلام فارغ.
ميشونيه
:
ليه يعني؟ هو التفريح حرام؟
عثمان
:
ما هو لو كان جرى للست بتاعتك حاجة، ماكنتش تقول كده.
جيبار
:
أيوه، ماهو حكم الفيكونت عثمان جاله خبر إن الست بتاعته عيَّانة
شوية.
عثمان
:
أيه، هي عيَّانة كمان؟ موش بزيادة الحبسة اللي هي محبوساها.
بيبن
:
إيه، الست بتاعتك محبوسة؟
جيبار
(لعثمان)
:
إيه ده، إنت بتخرف بتقول إيه؟
عثمان
:
إخص، دنا من قلبة كياني نسيت.
جيبار
:
طيب أسكت بقى أمَّا اصلح لك المسألة.
عثمان
:
لا في عرضك ماتصلَّحش، بزيادة اللي صلحته.
بيبن
:
مالكم بتقولوا إيه؟
عثمان
:
لا بس الست بتاعتي من زعلها على سفري، حبست نفسها في البيت للسبب ده،
مالهاش كيف شوية، عيَّانة.
بيبن
:
يظهر إنك متجوزها جديد يا فيكونت؟
عثمان
:
بقى لي شهر بس.
بيبن
:
هاهاها عريس جديد، لها حق تزعل. ودلوقت يالَّه عالبوفيه اللي عاملاه
البارونة صاحبة القصر ده.
ميشونيه
:
بس أنا صعبان عليَّ بنوا اللي محبوس في الكشك ده.
الخادمة
:
والله صحيح مسكين، صعبان عليَّ قوي.
بيبن
:
إبقوا ارقصوا وغنوا في حتة ثانية علشان ما ياخدش على خاطره.
الخادمة
:
ودلوقت اتفضلوا على البوفية.
عثمان
:
والله لانا عاوز بوفية ولا كلام فارغ.
بيبن
:
خليك انت هنا يا ميشونيه، أحسن أنا عايزك.
ميشونيه
:
الله الله! اشمعنى أنا … خير يا حضرة اليوزباشي.
بيبن
:
امسك وردية بدال بوارد.
بوارد
:
أيوه تعالى استلم علشان ألحق لي حاجة، قبل إخواتنا ما يشطَّبوا
عالبوفية.
ميشونيه
:
لكن دي موش نوبتشيتي، أنا كنت ديدبان الصبح.
بيبن
:
ماتعارضش، امسك وردية الديدبان باقول لك، وخلِّي بالك من الكشك ده اللي
محبوس فيه العسكري بنوا.
بوارد
:
أيوه استلم يا خوي، خليني أشوف شغلي في البوفية.
ميشونيه
:
لكن …
بيبن
:
بس اخرس، وفتَّح عينك طيب لأن جناب القومندان جاي هنا دلوقت يحقق ويَّا
العسكري بنوا، وقليل إن ما حكم عليه بضرب الرصاص.
ميشونيه
:
ضرب الرصاص!
بيبن
:
أيوه ما هو انت السبب، لأنك انت اللي كبَّرت الحكاية.
ميشونيه
:
خبر إسود، بالرصاص بالرصاص!
بيبن
:
الله، جرى لك إيه؟
ميشونيه
:
يا جناب اليوزباشي، موش مصيبة دي.
بيبن
:
أمَّال عايز عسكري زي ده، يتعدَّى على رئيسه ولا يتجازاش، إمسك بندقيتك، أقف
زي الناس، بلا كلام فارغ (يخرج مع
بارو).
ميشونيه
:
يا سلام يضربوه بالرصاص وأنا السبب، بقى علشان قلم بسيط، من تغفيلي أكون
السبب في مصيبة الشاب ده، إخص عليَّ، بهيم، حمار، مغفل، جبان (يبكي).
الخادمة
(داخلة)
:
الله الله! مالك بتعيط ليه؟
ميشونيه
:
اعملي معروف تعالي ساعديني.
الخادمة
:
أساعدك؟ عاوزني أعيَّط ويَّاك.
ميشونيه
:
لا، ساعديني على خلاص روح من الخطر، من الإعدام.
الخادمة
:
آه، ما دام فيها خلاص روح، أنا أساعدك بكل ممنونية.
ميشونيه
:
عظيم، يالَّه بقى اقلعي هدومك.
الخادمة
:
هدومي! أبدًا يستحيل.
ميشونيه
:
طيب شوفي لي أي بدلة حريمي عندك.
الخادمة
:
بدلة حريمي! تعمل بها إيه؟
ميشونيه
:
علشان يلبسها بنوا ويهرب، قبل ما يبندقوا عليه.
الخادمة
:
يبندقوا عليه؟
ميشونيه
:
حياته دلوقت في هدومك، اعملي معروف هاتي لي البدلة اللي قلت لك
عليها.
الخادمة
:
حالًا يا مسيو، مسكين بنوا مسكين (تخرج).
ميشونيه
:
أنا مقايس على كل حاجة، أحسن ما أكون السبب في إعدام شاب جميل زي ده، أما
أفتح الكشك اللي هو فيه … بنوا، إنت يا بنوا.
بنوا
:
جرى إيه؟
ميشونيه
:
إنت عاوز تخلص؟
بنوا
:
علشان إيه؟
ميشونيه
:
علشان إيه! علشان تخلص (صوت) آه حد
جاي.
الخادمة
:
اتفضل يا مسيو، أدي بدلتي اللي بالبسها يوم الحد.
ميشونيه
:
أوه مرسي، أما أديها له بقى … بنوا، يالَّه قوام البس الهدوم الحريمي دي
علشان تهرب قبل ما يحكموا عليك بالإعدام … آه يا مدموازيل الجميل اللي
عملتيه ويَّانا ده تستحقي عليه كل الشكر.
الخادمة
:
لا العفو يا مسيو دا واجب (تخرج).
ميشونيه
:
الله راحت فين! إخلص يا بنوا.
عثمان
:
آه ميشونيه.
ميشونيه
:
خبر أسود.
عثمان
(على حدة)
:
يظهر البقف ده حايضايقنا، وموش حايمكِّنا نهرَّب صاحبتنا، إنت بتعمل إيه
هنا؟
ميشونيه
:
أنا يا حضرة الباشجاويش ديدبان وحارس على بنوا.
عثمان
:
لا مافيش لزوم.
جيبار
:
أيوه مافيش لزوم. روح انت لأننا حانخش ويَّاه في سين وجيم.
عثمان
:
ونون كمان، يالَّه حصل أصحابك، خد لك حاجة عالبوفية.
ميشونيه
:
واعمل إيه في صاحبنا ده اللي لبسته مرة جوَّه؟ لكن دا اليوزباشي اللي كلِّفني
إني أنفِّذ الأوامر، أربع تيام.
جيبار
:
بتعصى الأوامر؟ أربع تيام …
ميشونيه
:
لا لا مافيش لزوم، أديني رايح، مسكين بنوا موش حايعرف يهرب، لا والمصيبة
الثانية إنهم حايلاقوه لابس مرة، نهايته أمره لله (يخرج).
عثمان
(لكلاريت)
:
يالَّه تعالي اهربي دلوقت حالًا.
حيبار
:
أيوه اخرجي قوام، أنا جيبار، ومعاي الفيكونت عثمان.
كلاريت
:
نعم عاوزين إيه (تدخل بملابس
نسائيَّة).
جيبار
:
إيه دا؟
عثمان
:
جبت الهدوم دي منين؟
كلاريت
:
ميشونيه اللي اداهم لي، وأنا افتكرت إنكم أنتم اللي باعتينه بيهم.
عثمان
:
طيب يالَّه اهربي قوام.
كلاريت
:
لا موش عاوزه أهرب، علشان أنتقم منك، واثبت لهم في المجلس العسكري إني
أنا ست موش راجل، وافضحك قدامهم علشان خيانتك لزوجتك يا خاين.
جيبار
:
لها حق يا أخي، ما دام زوجتك جات لك، كان لازم تعمل ترتيبك، وماتخليش رخره
تجيلك وتبهدل نفسها بالشكل ده.
عثمان
:
الله! إيه الكلام الفارغ ده؟
جيبار
:
دنا بس باصلح لك المسألة.
عثمان
:
بزيادة التصليح.
كلاريت
:
تستاهل كل اللي يجرى لك.
عثمان
:
بس اهربي، وبعدين أفهمك.
كلاريت
:
تفهِّمني إيه؟ أنا فاهمة كل حاجة، ولازم حانتقم منك بشكل ثاني.
عثمان
:
شكل ثاني!
كلاريت
:
حاتشوف بعدين، ودلوقت أديني حاخرج من هنا أروح بيت ماما أستنَّى
عندها.
عثمان
:
أيوه يالَّه، وأنا محصَّلك.
كلاريت
:
لا أبدًا، أنا موش عاوزاك تحصلني (تخرج).
جيبار
:
تحصَّلها إيه يا أخي، إنت حاتكوش على نسوان البلد كلها.
عثمان
:
يا خواتي أنا حاتجنن يا هوه!
جيبار
:
دلوقت بقينا في بنوا، نعمل إيه ويَّاه؟
عثمان
:
نعمل إيه؟ نحبسه مطرحها.
بنوا
(يدخل)
:
ماحدش شاف حضرة الظابط جيبار، آه أهو جنابه أهو.
عثمان
:
إنت إزاي خرجت من السجن؟
بنوا
:
أنا عارف هم سيبوني الصبح وجابوني مع الفرقة الثانية، ولما طلبت جناب
القومندان قال لي روح للظابط جيبار.
جيبار
(لعثمان)
:
وهي فين بدلته؟
عثمان
:
يعني ما انتاش عارف؟ أهي في الكشك.
جيبار
:
أيوه صحيح … بدلتك في الكشك، يالَّه قوام روح البسها.
بنوا
:
مرسي.
عثمان
:
أنا لازم أروح أحصَّل كلاريت.
برنسيس
(تدخل)
:
آه أديني لقيتك.
جيبار
:
أش وادي مراته الشرعية جات ثاني.
برنسيس
:
إن شاء الله تكون مبسوط من الفسحة دي يا فيكونت.
عثمان
:
مبسوط قوي، وخصوصًا من تصليح صديقي جيبار.
جيبار
:
أوه، ده مبسوط قوي بدون شك.
عثمان
:
بس عن إذنك يا حبيبتي، علشان عليَّ واجب في الخدمة ولازم أأدِّيه
دلوقت.
برنسيس
:
لا إستنَّى من فضلك، أحسن عاوزه أتكلم ويَّاك.
عثمان
:
تتكلمي ويَّاي؟
برنسيس
:
أيوه، أنا عايزة منك تفسير عن الست دي اللي كانت لابسة عسكري، وعملت
الدويللو.
جيبار
(على حدة)
:
إخص مراته رخره عرفت.
عثمان
:
ست إيه يا ستي؟ دا العسكري بنوا اللي عمل الدويللو.
برنسيس
:
ولكن مع الأسف بنوا ده كان واحدة ست.
عثمان
:
وأنا مالي، مين قال له يبقى واحدة ست.
برنسيس
:
أسكت، أنا عارفة كل حاجة، دي المتريسة بتاعتك.
جيبار
:
هيه شفت إن الست بتاعتك عارفة الحقيقة زيي.
عثمان
:
يا سيدي بس اتلهي واسكت.
برنسيس
:
ولا تخشتيش إنك تدخل المتريسة بتاعتك في أورطة زي دي كلهم تحت
السلاح؟!
جيبار
:
إخِّيه على كده.
عثمان
:
إخِّيه عليك وعلى معرفتك.
برنسيس
:
ودلوقت حيث إني عرفت كل حاجة، لازم أنتقم منك.
عثمان
:
الله ينتقم منكم يا بُعَدا (يدخل
القومندان).
جيبار
:
إخص جناب القومندان.
القائد
:
هيه، أنا جيت دلوقت علشان أبتدي في التحقيق مع بنوا.
جيبار وعثمان
:
آه، إتوَحَلْنا.
القائد
:
حط الترابيزة هنا، وحط الأوراق عليها، واقعد علشان تكتب.
ميشونيه
:
حاضر.
برنسيس
:
جناب القومندان جاي يحقق مع بنوا؟
القائد
:
أيوه؟
برنسيس
:
وإيه اللي عمله بنوا علشان تحقق ويَّاه؟
القائد
:
متهم بأنه امبارح ضرب جماعة من الظباط والصف ظباط، ومن ضمنهم
الفيكونت.
برنسيس
:
يستاهل، مين قال له ياخد له متريس زي دي.
القائد
:
بقى بنوا ده يبقى المتريس بتاعتك يا فيكونت؟
عثمان
:
لا يا جناب القومندان، أنا مجنون لما أخلي المتريس بتاعي راجل بَقْف زي ده.
برنسيس
:
هو إيه الكلام دا؟ دا بنوا اللي عندكم ده، واحدة ست موش راجل.
القائد
:
عجيبة، بقى بنوا ست موش راجل؟!
برنسيس
:
أيوه ست.
القائد
:
طيب وازَّاي عرفت إنه ست؟
برنسيس
:
لأنه امبارح لما أغمى عليه بعد الدويللو، فكِّيت له صدره، لقيته ست موش
راجل.
ميشونيه
:
بقى المبارزة اللي كنت حاموت فيها دي، كانت مع واحدة ست، ياريتني موت
فيها.
القائد
:
بقى صحيح اللي بتقوليه دا يا مدام؟
برنسيس
:
أيوه وشرف جناب القومندان.
عثمان
:
لا يا جناب القومندان دي بتهزَّر، بلاش الهزار البارد ده.
القائد
:
أسكت أنت؛ لأن دي جريمة فظيعة، ولازم أحققها بنفسي، خليك انتِ هنا يا مدام
لحد ما نطلبك.
برنسيس
:
حاضر يا جناب القومندان.
القائد
:
جيبار، هات المسجون هنا حالًا.
جيبار
:
إيه العمل دلوقت؟
القائد
:
باقول لك هات لي حالًا بنوا.
بنوا
:
بنوا حاضر يا افندم (يخرج من الكشك بملابس
عسكرية).
القائد
:
آه.
ميشونيه
:
الله! دا موش بنوا، دا صاحبنا الحلواني اللي اتخانقت ويَّاه في دكان
البرانيط.
القائد
:
اتقدِّم شوية.
بنوا
:
حاضر.
القائد
:
أيوه صحيح الست لها حق، دا موش بنوا أبدًا.
ميشونيه
:
ودا كان بيعمل إيه في الكشك يا خوي.
بنوا
:
بردون يا جناب القومندان.
القائد
:
مظبوط دي سحنة مرة موش راجل، اسمع يا بنوا.
بنوا
:
جناب القومندان.
القائد
:
لازم تفهم إني أنا عرفت كل شيء.
بنوا
:
لكن الغلطة موش غلطتي يا جناب القومندان؛ لأني لما اتخانقت في دكان
البرانيط …
القائد
:
برانيط! طيب، وإيه اللي خلاكِ تعملي كده؟ موش عيب بصفتك ست، تعملي عمل زي
ده؟!
بنوا
:
إيه، أنا واحدة ست؟!
عثمان
:
أيوه انت ست يا أخي.
القائد
:
وعارفة انت معرَّضة نفسك لإيه؟
عثمان
:
أيوه عارفة انت معرضه نفسك لإيه؟
القائد
:
للسجن، علشان لبست بدلة رسمية بغير وجه قانوني.
بنوا
:
إزاي ده؟! أنا عسكري تحت السلاح يا جناب القومندان.
القائد
:
بقى انت حاتفضلي مصمِّمة إنك راجل؟
بنوا
:
أما غريبة دي، أيوه أنا راجل!
عثمان
:
قال بتخشِّن حسَّها، علشان نقول إنها راجل.
القائد
:
إنت غلطانة.
عثمان
:
غلطان قوي.
جيبار
:
معلوم غلطان قوي.
بنوا
:
غلطان اللي أنا راجل؟!
القائد
:
تعرفي إذا كنت راجل زي ما بتقولي، لازم تموت رميًا بالرصاص.
عثمان
:
أيوه بالرصاص والطوب والبطاطس اللي عنده في الدكان.
بنوا
:
بالرصاص؟
القائد
:
لازم نحاكمك لتعدِّيك على الظباط اللي ضربتهم، وعضك عشيقك كمان.
بنوا
:
أنا ليَّ عاشق وعضيته كمان؟
القائد
:
أيوه امبارح بالليل.
ميشونيه
:
أيوه أما نطوِّل في التحقيق شوية، على بال صاحبنا ما يكون فك … أيوه قدامي،
أنا شاهد.
بنوا
:
شاهد؟ ومين هو العاشق اللي عضيته ده؟
عثمان
:
الفيكونت اللي قدامك ده.
بنوا
:
لكن أنا ما اعرفش حضرته أبدًا.
ميشونيه
:
أسكتي يا الغبرة.
عثمان
:
أسكتي يا عضاضة الغبرة، يا نطَّاحة.
القائد
:
وانت ما تعرفهاش يا فيكونت؟
عثمان
:
لا بس معرفة بسيطة كده، ما كانتش تصل للرفصان والعضضان والنطحان.
القائد
:
اعترفي أحسن لك.
عثمان
:
أيوه أحسن لك من ضرب الرصاص.
جيبار
:
أيوه أحسن من الإعدام.
بنوا
:
إعدام! لا أنا أعترف لكو باللي أنتو عايزينه.
عثمان
:
أيوه أحسن.
جيبار
:
أحسن قوي.
القائد
:
اكتب يا ميشونيه، بقى الفيكونت عثمان هو اللي غواك؟
بنوا
:
أيوه، هو اللي غواني.
القائد
:
غواك ازَّاي؟ احكي لنا الحكاية.
بنوا
:
حاقول لدول إيه دلوقت؟
عثمان
:
دا شيء في غاية البساطة، خلِّي صوتك ستاتي.
بنوا
:
أصل الحكاية يا جناب القومندان، أنا كنت ماشية في الشارع، النبي ما تغلب
لك ولية، ولا يتيم لك ذرية، وتنعزم في فتحة وتاكل مهلبية، وتترقَّى وتشتغل في
الكهربائية.
القائد
:
إيه ده يا ولية؟!
عثمان
:
وبعدين جنابه قال له يا مدموازيل أما أقول لك، وبعدين أنا سمعت اللي قاله
لي.
بنوا
:
وبعدين أنا سمعت اللي قاله لي.
القائد
:
وقال لك إيه؟
عثمان
:
قال لي تيجي تتغدِّي ويَّاي يا كتكوتة.
بنوا
:
قال لي تيجي تتغدِّي ويَّاي يا كتكوتة.
عثمان
:
وبعدين قلت له بكل ممنونيَّة يا كتكوت.
بنوا
:
وبعدين قلت له بكل ممنونيَّة يا كتكوت.
عثمان
:
أديك سمعت الحكاية يا جناب القومندان، حيث إن اللي ضربته واحدة ست أظن
مافيش لزوم.
جيبار
:
مافيش لزوم إيه، وشرفنا العسكري نودِّيه فين، لما ولية زي دي تضربنا
كلنا.
عثمان
:
أنت لسه حاتصلح ثاني؟!
القائد
:
أيوه صحيح، دي دلوقت منسوب لها تلات تهم؛ أولًا: تعدِّيها بالضرب والرفس.
ثانيًا: لبسها ملابس عسكرية. ثالثًا: لأنها كانت تبقى أجمل من كده لو فضلت
ست.
بيبن
(داخلًا)
:
يا جناب القومندان.
القائد
:
إيه فيه إيه؟
بيبن
:
ضبطنا بنوا خارج من هنا، وهوَّ لابس ملابس واحدة ست.
القائد
:
هو فين؟
بيبن
:
أهم جايبينه أهم.
كلاريت
:
سيبوني باقول لكم (تدخل وخلفها
جنديَّان).
القائد
:
مظبوط، أهه دا العسكري بنوا اللي حكمت عليه بخمسطاشر يوم نوبتشية أمَّا
كويس خالص، هو لابس ست، والست لابسة عسكري؟
كلاريت
:
لا أبدًا، أهه دا بنوا الحقيقي، وأنا مايصحش أتحاكم قدام مجلس عسكري لأني
ست. أنا كلاريت مراة الفيكونت عثمان.
ميشونيه
:
مراة الفيكونت!
جيبار
:
معذورة، عاوزه تخلَّص نفسها، حاتقول إيه غير إنها مراته.
عثمان
:
يا جدع فرستني!
القائد
:
صحيح يا فيكونت الكلام ده؟
عثمان
:
أيوه للأسف يا جناب القومندان.
القائد
:
أمَّال مين الحرمة دي؟!
كلاريت
:
أهه دا بنوا، وأنا خدت اسمه وحلِّيت محله علشان أنتقم من جوزي.
القائد
:
بقى المغفَّل دا هو بنوا الحقيقي.
بنوا
:
آه، بنوا.
القائد
:
أمَّال ليه بتقول إنك واحدة ست؟
بنوا
:
علشان يعجبكم.
القائد
:
إخص الله يخيبك، أربع تيَّام حبس، يالَّه خدوه.
بنوا
:
هو أنا حاقضي الثمانية وعشرين يوم كلهم في السجن (يخرج بالعساكر).
عثمان
(لكلاريت)
:
عجبك كده؟ مبسوطة من الجرسة دي؟
كلاريت
:
بالطبع.
برنسيس
(داخلة)
:
آه، دا بنوا أهه، اسمع يا بنوا.
كلاريت
:
لا يا مدام، أنا موش بنوا، أنا واحدة ست.
برنسيس
(لعثمان)
:
شوف ازَّاي ظهر إنها واحدة ست.
كلاريت
:
والست بتاعته، يعني مراته، فهمت يا مدام؟
جيبار
:
ياخي بزيادة ماتطلعش فيها بقى، إنت بتقول مراته، قدام مراته الشرعية
كمان؟
برنسيس
:
يالأسف يا مسيو أنا موش مراته.
عثمان
:
صدَّقت؟
جيبار
:
إنتو بتقولوا إيه؟
كلاريت
:
باقول إني أنا زوجته الحقيقية.
جيبار
:
غريبة! وانت ازَّاي يا أخي مافهمتنيش من الأول إنها مراتك.
عثمان
:
يخرب بيتك، كل دا ولا فهِّمتكش، وأنا قايل زيادة عن ميت مرة، دانت نازل
فيَّ تصليح لما هريتني.
جيبار
:
أوه، لا أنا أعتبر إنك خنتني يا فيكونت.
كلاريت
:
وخاني أنا كمان (تبكي).
برنسيس
:
وأنا كمان، مافيش قدامي دلوقت غير كوني أرمي روحي في البحر.
جيبار
:
لا أوعي خسارة، بس طولي بالك، وأنا أصلِّح لك المسألة.
عثمان
:
أيوه، خليه يصلح لك، الأسطى دا راجل طيب، وإيده خفيفة. بردون يا مراتي،
سامحيني علشان خاطري.
كلاريت
:
لا أبدًا.
القائد
:
بقى المسألة فيها جريمة وأنا بنفسي حكمت فيها، تعالوا كلكم (يدخل الجميع) حيث إنه ظهر من التحقيق إن
المسألة سوء تفاهُم عائلي، حكمت أنا القائد بأن الزوجة تسامح زوجها.
جيبار
:
أمر القائد لازم يُنفَّذ.
كلاريت
:
والعسكري واجب عليه الطاعة.
عثمان
:
آه يا مراتي.
الجميع
(يقولون اللحن الختامي للرواية)
:
أديك يا عثمان بعد جهاد
طلعت متهنِّي بمراتك
سوء التفاهم مهما زاد
رجع ظهر بركة نيَّاتك
تعيش لنا وتجيب أولاد
وربنا يبارك في حياتك
وأدي ٢٨ يوم
فيها مزايا تفيد القوم
التمثيل أفضاله عديدة
بس الرك على الإصلاح
الأمة تصبح به سعيدة
والشعب ينول كل نجاح
(انتهت الرواية بحمد الله.)
