الترحال
مسنود عليك،
مسنود!
روحك روايح العود،
صوتك وتر
توِّن عليه العود،
واعْزف يا ليل موعود،
روحي تجيك ماتْعود،
متْمسنيش يا دود،
متكلش عكازي.
لولا النجوم السود،
كنت القمر غازي.
قلبك يا ليل الأسى
ما راح اخلِّيه حي،
قلبك يا ليل لو عمى،
أنا غزوي لونه ضي!
•••
يا جدة ليه ضحكتك
سودة سواد خِرقتك؟
بُصي لفوق عَ السما
تلقي النجوم ولفين.
طبْ ليه تروح ولفين،
ياللي نويت السفر!
عارف؟
أكيد عارف،
قلب الطريق مِ الحجر
ملهوف عليك، خايف،
خريف ورق الشجر.
طب ليه تروح ولفين؟!
•••
لازم تعيش يا ياسين،
وتعيشي يا بهيَّة،
كل الولاد عطشانين،
كل البنات مايه!
•••
مسنود عليا ايَّاك!
عمري ما اكون مرساك،
كل العيون ميادين،
كل السنين نكراك.
عين مين تساعَك مين؟!
وسْع التراب ما كفاكْ!
والهجر ماهوش حل،
والغربة خالية الضل.
كل الليالي طوال،
لو كنت واد قوَّال،
الليل ملهْش ودان.
شمس الغريب ضلمة،
حتى ولو كانت … شايلة القمر كفَّاكْ!
نفسي اسألك، ممكن؟
عارفك طويل البال،
وسْع التراب ما كَفَاكْ.
إيه بدِّل الأحوال؟
والحزن ليه كفَّاكْ؟
غِنوتها،
غِنوتها دَمَّتْني.
وانْ كنت يوم مفرود
دلوقتِ أنا محني؛
عكازي واكْله الدود!
متقُلَّهاش غنِّي
«آه يا ليل يا ليل، يا ما طال الليل.»١
متغنِّيش
«رَصُّوا الأماين على ضهري وآدوا النار يا
ليل.»١
متوجعِنيش
«لا سيف جرحني، ولا ضرب نار يا ليل.»١
عرفت ليه مسافر
وصوتي دامع مِنتحبْ؟!
لو جت فِ يوم من تحِبْ،
ورياح غضبها هبْ،
وقالت لك: أنت السببْ،
ياللي كلامك كَدَبْ،
أنسى القلم لو كتبْ،
بيني وبينك نسبْ.
واقلب مديحك سبْ،
تبَّت حروفك تبْ!
•••
ياللي فْ هواكِ القلب
شاببْ، وحب، وطبْ.
أنا خيري لم يحتسبْ،
أنا خيري لوْ يحتسبْ؛
يملى السما للركبْ.
وأنا شِعري آه انتسبْ
للي مقلش الشِّعر،
ياللي انتشيت بالرضا،
قلبي انتشَى بالكِبْر!
يا ابو العيون ميادين،
لو مش مصدق رُوح،
تلقاها عند الطين،
واهي عارفة قصتنا،
اسألها: ليه؟
هاتبوح.
ليه كارهَة بصتنا،
ومتحْكيهاش عنِّي،
أنا سيرتي بتْأني،
تسمع أناهَا عديد.
كتفُه الشمال مايل؛
من تقْلة الشايل.
كِتفه اليمين ميَّال؛
من خفَّة المتشال.
وفْ سكته طريقين؛
راح يمشي فِ الاتْنين،
يوصل تقيل شيلُه،
قبل الخفيف متشال.
يا قسوة الترحال!
مسكين يا واد، مجبور،
قلبك أراضي بور
ممسهاش مايَّه.
أنت الحصان عايش،
والمُهرة مش حيَّة.
والمغرَمين طاروا،
والمغرَمات باروا،
وأنت الوحيد عايش!
مسكين يا واد قوَّال،
كل الليالي طوال،
وأنت الوحيد عايش!
يا قسوة الترحال!
٢٠١٣م
١
أغنية من التراث الفلاحي.
