التقديمة
(على بروجي شعبي أو هيصة نحاسية يدخلون ويتجمَّعون في خطوات هازئة هازلة وفى ملابس ملفقة من تراث الصعلكة في الحواري والكفور …
يتْلُون بيانَهم الأخير جماعيًّا وفرديًّا.)
الجوق
:
ليلتنا فنطزية
ضحكة ماهيش أذية
وفرحة مش رزية
سمع … يا حاضرين … للفنانين المنقرضين
اللي راحت عليهم … لكن مش معترضين …
•••
إحنا اللي راحت علينا زي سوارس يا بيه
بعد ما صارت القهوة كافيتيريا
والجرن صبح كباريه
والفن صار تطجين
وبعد ما صبح الفنان أسطى
على كل لون يا باتصطة
والتليفزيون اتلوَّن واشتغل من غير مفتاح
والهشك بشك ع الموضة تَوَل الفلاح
واتْلف السوليفان ع القشطة
والعتبة صبحت ميلامين …
تليفزيون
:
يا تجيب لي شاكلاته يامنيش لاعبة
وخدني في الطيارة أزور الكعبة
الجوق
:
إحنا بتوع فن الكاني والماني ودكان الزلباني
بنوَّع فن كان يا مكان في كل زمان ومكان
فن الأدباتية المشخَّصاتية الكلمانجية والأراجوز
فن الحكاواتية الهلالية الزناناتية
وفرقع لوز …
بتوع يا ليل ويا عين … ويا آه
كالميميرا كالسبيرا كوم سي كوم ساه
إحنا اللي رطنَّا باللاوندي للاوندي
وبالرومي للرومي
وبالتركي للعثمانلي
إحنا اللي قلنا الكلام دوغري بما معناه
كدنا الممالك
مماليك سلطنة وولاة.
مغنٍّ
:
علشان مراكبك تعدي لبكره يا بلدنا
ويخف حِمل الليالي عليكو يا أولادنا
والغُمة تنزاح عن الأمة وتلقى صباح
لا يتسرق مننا الصندوق ولا المفتاح
ويلاقي كل اللي زي حالتكو وحالتنا
سند ومُعين …
إحنا اللي قلنا الكلام واحنا ندور ونلف
علشان تخف الحمول
والليل بنوركو يخف
الدنيا دي علمتنا … لو يكون فيه خيط
أوعى تشدُّه لمنتهاه … وتحف
لينقطع بك … ومين راح يغيتك مين؟
•••
إحنا اللي دُوخنا أتألمنا
وفهمنا الفولة لمَّا تعلمنا
من التعالب الدحلبة
ومن الحِناش السحلبة
ومن القرود الشقلبة
ومن النيران السهلبة، ومن الكرابيج اللهلبة
ومن الرياح الدردبة
ومن الفقير مد البساط الاحمدي ع المصطبة
ومن الحمير قوة الاحتمال
ونجوع ولا نمد الايدين
إحنا الفنانين المنقرضين …
•••
مانحبش الفرح هبهبة … ولا الحزن مندبة
ولا الخناق عبعبة.
•••
إحنا اللي طالعين من الطين … ومن التاريخ جايين
وعارفين إن الزمن سابقنا
والوقت سارقنا
والموت ملاحقنا
واننا ضايعين ضايعين
وسط الفن الهجين والفن السجين
اللي فارش على العقول الغيامة
وحاطط ع اللسان والعقل ميت كمامة
وسايق الأيامة
ومخبي برانيطه تحت العمامة
وقاصد إن العصر الآتي
بموجه العاتي يغرَّقنا
من بعد ما يقطع حبال الجغرافيا والتاريخ ويغرَّقنا.
•••
ولذلك نُعلن نحن … نحن … الفنانين
المنقرضين
نعلن باسم فننا المنقرض الهالك
المجتهد اللي مش متهالك
واللي مهما لفت به السكك واتلعبكت به المسالك
أصيل المدارك
فننا … اللي رسم حدوده جدنا ابن دانيال
وعمنا ابن عروس
وتاج راسنا ابن النديم … وانا
حيص بيص …
فننا اللي خط خطوطه أبو فرقلَّة
وانا … نطَّاط الحيط
واللي زبط زعبوطه جحا وأبو النواس
ومعيط … أنا
وزعيط … أنا
وبَرم طرطوره شكوكو … وانا
شُرم … بُرم … وانا
نص نيص
نعلن باسم هذا الفن المنقرض العظيم
وبلسان فصيح وصريح
ونسجَّل هذا التصريح بكل وعي سليم وبعقل حكيم …
•••
بكره ابن النهارده
والنهارده ابن امبارح
والزمن آتي … ورايح
ولكل وقت أدان
ولكل زرع أوان
واللسان حصان
ولذلك فالفن العظيم بيفضل حكمة لكل أوان
ومتعة في كل زمان ومكان
ومن هنا
من قلب القاهرة العامرة الطاهرة
اللي شهدت وشاهدت تفانين جدودنا العظام
نقدِّم هذه الحفلة الساهرة
وبنفترض
إحنا يا بتوع الفن المنقرض
إنها حتصحي في قلوبكم منابع الذاكرة
للفن البكر
اللي مش حكر على الكاسكيتة
ولا ع البرانيط
الفن الجميل البسيط
اللي مش عويل ولا عبيط
واللي يقدر يسحركم ويمتعكم وهو لابس اللبدة
والزعابيط.
حيص بيص
:
ويلا للا يا نص نيص … يا نوارتنا
دُق الطرمبيط
وخليك واد حويط
زمَّر وخبِّي دقنك
وبالهداوة … لا يطق لك عِرق … ويطلع آخر الزمر طيط.
(نص نيص يبدأ الملاغية في الوقت الذي يستعد الجوق لمشهد القرية.)
نص نيص
:
ليلتنا فنطزية … وفنطزية من الفنطزة، ودي معناها
القلب الدافي والجيب الخالي
وهي عكس العنطزة
العنطزة قلاطة والفنطزة بساطة
الخواجات بتوع بلاد الخواجات يقولوا على
الفنطزة «فنتزة» مايصة … ومعناها
السَّرح بالعالم وخيالات الهلبمبم
واضربك بونيَّة تخش الحيط
وارقصك ع الحيط واغرقك في الهجايص
لا … وألف كلا
الفنطزة جدعنة ومجدعة … آه
معاك قرش فنطز بيه على أول صاحب يقابلك
أو فنطز بيه علينا يا بيه
إوعى تخبيه بخل … أو تنكره عوالة
لأنه إن مكانش معاك … حط إيدك على
كتفنا وتعالى نسرح مع بعض … نشحت سوا
عشَانا عليك يا رب …
حيص بيص
(معترضًا يسرع رافضًا سِكة الابتزاز والشحاتة)
:
لأ، شهرتنا الليلة بلوشي … للي معاه وللي
مامعاهوشي
للناس البلسم اللي ريحها يشفي الكرب ويفرَّج عن
القلوب
وللناس العلقم … اللي بتمرر الريق والمطرح
لكننا مابيهمناش … نفعتونا والَّا مانفعتوناش
المهم سهرتنا ماتروحش في الطناش …
مغنٍّ
:
ويا قلب صافي وصادق النية
ريش حمامك افتح البنيه
واخضع لحكم الفن والغية
تصبح ليلتنا أُنس للمتآنس
وفنطزية تلم فرط المجالس
تفضح المتواكس والمتوالس
وتفك أسْر المحابس
دي الأرض نشفت … طالبة الميه …
حيص بيص
:
ويحلا بينا الكلام.
(يبادله الكلام وهو يستعد للتشخيص ولعب دور العمدة.)
خُش ع الكفر اللي مايتسمَّاش اللي سمَّاه …
نص نيص
:
بس حسك عينك إنت ويَّاه
تزود ع اللي شفناه وسمعناه
أصل يا ابني انت ويَّاه … ابن آدم مننا
إن مااتمسكش من لسانه … ح يتعلق من
قفاه!
